Стив Уиткофф ва Жаред Кушнер Москвага Доналд Трампнинг урушни тўхтатиш бўйича янги таклифини олиб келиши керак эди. Уларнинг Кремлга ташрифининг кўплаб элементлари ҳам Вашингтоннинг Россия ва Украина ўртасидаги музокаралар жараёнини қайта тиклаш нияти жиддийлигини кўрсатди. Аммо Америка делегациясининг Владимир Путин билан учрашуви натижалари унчалик тасалли бера олмайди: Россия раҳбарияти ҳамон жанг майдонидаги устунлигини ҳисобга олишни талаб қилмоқда ва «можаронинг бирламчи сабаблари» бартараф этилишини хоҳламоқда. «Медуза» Трампнинг Москва ва Киевни яраштириш учун навбатдаги уриниши ҳақида нималар маълум эканини кўриб чиқди.

  • АҚШ президентининг махсус элчилари Стив Уиткофф ва Жаред Кушнер (у Доналд Трампнинг куёви ҳисобланади) 5 сентябр куни АҚШ ҳарбий-ҳаво кучларининг Boeing C-32A русумли самолётида Москванинг Внуково-2 аэропортига учиб келди (бунақаси биринчи бор кузатилди, олдинги ташрифлар бизнес-жетда амалга оширилган). Уларни Россия президентининг махсус вакили Кирилл Дмитриев (олдинги музокараларда ҳам у ҳамкорлик қилган) кутиб олди.
  • Бу ташриф арафасда Владимир Путин қисман ён беришга тайёрлигини намойиш этди. У Киевга зарба беришни уч кунга тўхтатишни буюрди. Украина томонининг бутун фронт чизиғи бўйлаб оташкесим эълон қилиш борасидаги таклифини эса Путин эътиборсиз қолдирди.
  • Америка делегацияси аэропортдан тушлик қилиш учун ресторанга йўл олди. Бу сафар Россия томони меҳмонларни кутиб олиш учун Москва марказидаги Avrora ресторанини танлади. Ресторан ёнида Уиткофф, Кушнер ва Дмитриев «Барчаси Ғалаба учун!» лавҳаси фонида суратга тушишди.
  • Тушликдан сўнг Уиткофф ва Кушнер ниҳоят Кремлга етиб келишди. Путин билан учрашув Катта Кремл саройининг Қизил меҳмонхонасида ташкил этилди. ТАСС агентлиги таъкидлашича, «у ҳам ҳашаматли бўлса-да, Яшил меҳмонхонага қараганда пастроқ даражадаги тантанали қабул жойи ҳисобланади» (Қизил меҳмонхонадан Москвага расмий ёки давлат ташрифи билан келган мамлакатлар раҳбарлари билан протокол бўйича икки томонлама учрашувлар пайтида фойдаланилади). Музокаралар жойига урғу бериш Вашингтондан келган делегацияга кўрсатилган юксак ҳурматни таъкидлаши керак эди: аввалги учрашувлар Путиннинг Кремлдаги асосий иш қароргоҳи – Сенат саройининг Вакиллар хонасида бўлиб ўтганди, деб эслатади «Агентство».
  • Путин билан учрашув уч соат давом этган. Уиткофф учун бу Россия раҳбари билан ҳисоб бўйича саккизинчи музокара бўлди, Кушнер учун – учинчиси.
  • Кремль музокаралар бошланишидаги етти дақиқалик лавҳани эълон қилди. Бу вақт ичида Путин Уиткофф ва Кушнерга Россия бутун фронт чизиғи бўйлаб вақтинчалик оташкесим жорий этишга рози бўлмаганини билдиришга улгурди, у буни Украина ҳукумати тегишли таклифини расмий ахборот алмашиш каналларини четлаб ўтган ҳолда илгари сургани билан изоҳлади.