Булунғур туманида истиқомат қилувчи Бибимарям Холбўтаева ўзининг тирик инсон бўлишига қарамай, давлатнинг айрим электрон тизимларида вафот этган шахс сифатида қайд этилганидан шикоят қилмоқда.
Унга кўра, бу ҳолат 2022 йил 14 август куни биринчи фарзандини дунёга келтириш учун туғуруқхонага мурожаат қилганидан кейин содир бўлган.
- Биринчи туғруғимда туғуруқхонага борганман. Болам сунъий туғуруқ орқали туғилган. Орадан уч кун ўтиб, мен туғуруқхонадан чиққанимдан кейин қандайдир хатолик билан бола ўлимига она ўлими ҳам қўшиб киритилган экан. Шундан кейин мени давлат базасида вафот этган деб чиқариб юборишган, - дейди Бибимарям Холбўтаева.
Аёл бу ҳолатдан кейинги йили иккинчи марта туғуруқхонага борганида хабар топган.
- Тизимдан мени топа олишмаган. «Фуқаро, сиз база бўйича ўлик деб чиқяпсиз», дейишди. Бу қандай бўлиши мумкинлигини сўраганимизда, туғуруқхона ходимлари хатолик ўзларидан ўтганини тан олишди. Ҳатто кичик қоғозга хатолик бўйича тилхат ҳам ёзиб беришди, - дейди у.
Шундан сўнг унинг яқинлари турли идораларга мурожаат қилиб, маълумотларни тўғрилашга ҳаракат қилган. Натижада аёлнинг айрим ҳужжатларидаги муаммо ҳал қилинган, иккинчи фарзанди учун туғилганлик ҳақидаги гувоҳнома ҳам олинган.
Аммо муаммо электрон биометрик тизимларда сақланиб қолган.
- Менга ҳужжатларингиз ҳал бўлди, деб айтишди. Лекин Face ID орқали текширилганда ҳамон «фуқаро тирик эмас» деган жавоб чиқяпти. Бу ҳолатни кредит олиш учун марказга борганимда яна кўрдим. Паспортимни бердим, Face ID орқали текширишганда «фуқаро тирик эмас» деб чиқди, - дейди Холбўтаева.
Унинг сўзларига кўра, MyGov иловасида ҳам худди шундай маълумот акс этган.
- Исбот учун MyGov иловасини ҳам юклаб кўрдим. У ерда ҳам фуқаро вафот этган деб кўрсатилган. Паспорт столига борсам, улар «муаммо бизда эмас, база ишламайди», дейишди. Туғуруқхонага борсам, бош шифокор ҳам ҳайрон бўлди. «Сизни тирик деб киритиб берганмиз, бундай ҳолат биринчи марта бўляпти», дейишди, - дейди аёл.
Бибимарям Холбўтаева муаммони ҳал қилиш учун бир қатор давлат идораларининг ишонч телефонларига қўнғироқ қилганини айтмоқда.
- Менга уч кун ичида жавоб беришларини айтишди, аммо жавоб бўлмади. Кейин 1000 рақамига қўнғироқ қилдим. Вазиятни тушунтирсам, «фуқаро, кечирасиз, агар сиз тизимда ўлган деб топилган бўлсангиз, аризангизни қабул қила олмайман», деган жавобни олдим, - дейди у.
Аёлнинг таъкидлашича, турли идораларга бориб ҳам муаммони ҳал қила олмаганидан кейин у оммага мурожаат қилишга қарор қилган.
