Шотландия, Уэлс ва Шимолий Ирландия раҳбарлари Лондондан Буюк Британия таркибидан чиқиш бўйича референдумлар ўтказиш ҳуқуқини беришни талаб қилувчи қўшма декларацияни имзолайди, деб хабар берди The Sunday Telegraph.
Нашр 14 сентябр куни Уэлснинг Кардифф шаҳрида ўтказилиши режалаштирилган учрашувни мисли кўрилмаган воқеа деб атади ва ушбу келишув «Буюк Британияни парчалашга қаратилгани»ни таъкидлади.
Шотландиянинг биринчи вазири Жон Суинни, Уэлснинг биринчи вазири Рун ап Иорверт ва Шимолий Ирландиянинг биринчи вазири Мишел О’Нил учрашувига Ирландиянинг миллий-республикачи «Шинн Фейн» партияси раҳбари Лу Макдоналд ҳам қўшилади.
«Тарихда илк бор Шотландия, Уэлс ва Шимолий Ирландияга мустақиллик тарафдори бўлган биринчи вазирлар раҳбарлик қилмоқда. Ҳозирги статус-кво яшовчан эмаслиги, беқарорлиги ва Лондон ҳукумати Буюк Британия парчаланганидан кейинги истиқболга тайёрланиши кераклигининг бунданда яққол далили йўқ», — дея Суиннининг сўзларидан иқтибос келтиради нашр.
У Буюк Британия ҳукумати раҳбари Энди Бёрнэмга «Буюк Британиянинг сўнгги бош вазири сифатида тарихга кириш»и ҳақида ўйлаб кўришни таклиф қилган.
Газетанинг қайд этишича, Кардиффда имзоланиши режалаштирилаётган ўзаро англашув меморандуми тўртта соҳа — иқтисодиёт, энергетика, Европа ва халқаро ҳамжамият билан муносабатлар ҳамда ўз тақдирини ўзи белгилаш ҳуқуқини ўз ичига олади.
Шунингдек, унда Буюк Британиянинг ҳозирги барча маъмурий-сиёсий қисмлари Европа Иттифоқи таркибига кириши кераклиги кўрсатилади: Шотландия ва Уэлс янги аъзо сифатида, Шимолий Ирландия эса Ирландия Республикасининг бир қисми сифатида.
Учрашув ҳақида АҚШ президенти Доналд Трамп Ирландия бош вазири Михол Мартин билан Дублинда учрашганидан бир кун ўтиб маълум бўлди. Учрашув вақтида Трамп республика Шимолий Ирландия билан бирлашишини хоҳлашини айтган. Британиянинг асосий партиялари унинг бу баёнотини танқид қилган.
