DW хабарига кўра, 23 октябр куни Орёл вилояти губернатори Андрей Кличков ҳудудга ракета зарбаси берилганини маълум қилган. Унинг айтишича, саккиз киши яраланган, аксарияти енгил жароҳат олган. Губернатор Украина қуролли кучларини «фуқаролик объекти»га ҳужум қилишда айблаган.
Кейинроқ Кличков зарба Орёлнинг Совет туманидаги заводга текканини билдирган. У корхонада кучли ёнғин чиққанини, кейинчалик ўчирилганини айтган. Махсус хизматлар вайроналарни тозалашга тайёргарлик кўраётгани ҳам маълум қилинган.
Губернаторга кўра, яқин атрофдаги бир нечта кўп қаватли уйнинг деразалари ва бир неча автомобил ҳам зарарланган.
Украинанинг Exile+ ва Supernova+ мониторинг Telegram-каналлари ҳужум нишони «Протон» заводи бўлганини хабар қилган. Уларга кўра, корхона Россия ҳарбий саноати учун оптоэлектроника ишлаб чиқаради. Унинг маҳсулотлари, жумладан, С-71 «Ковёр» авиация қанотли ракеталари, 9М723 «Искандер-М» баллистик ракеталари ва «Панцирь-С1» зенит ракета-тўп мажмуаларида қўлланади.
Exile+ баҳосига кўра, зарба оқибатида заводнинг камида битта ишлаб чиқариш цехи вайрон бўлган. Канал бинонинг юқори қаватлари, томи ва фасад конструкциялари қулаб тушганини, бу эса цехдаги технологик линиялар ишини давом эттиришга имкон бермаслигини билдирган.
Қурбонлар ҳақида эса турлича хабарлар тарқалган. Supernova+ 13 киши, жумладан, 11 аёл ҳалок бўлганини ҳамда 30 дан зиёд киши бедарак йўқолганини даъво қилган. Россиялик блогер Анастасия Кашеварова ҳам ҳалок бўлганлар борлигини ёзган, аммо уларнинг сонини келтирмаган. Бу маълумотларнинг мустақил тасдиғи хабарда келтирилмаган.
Россия Мудофаа вазирлиги шу куни мамлакатнинг етти ҳудуди ва қўшиб олинган Қрим устида Украинанинг 87 та учувчисиз учиш аппарати йўқ қилинганини билдирган. Вазирлик рўйхатида Орёл вилояти ҳам бор, аммо бу баёнот заводга берилган ракета зарбаси тафсилотларини очиқламайди.
