Канадада Кокитлам шаҳрини Woodfibre LNG экспорт терминали билан боғлайдиган Eagle Mountain — Woodfibre (EGP) газ қувури қурилиши давом этмоқда.
Мутахассислар лойиҳанинг муҳим босқичини якунлаб, Монмут тоғи ва Скомиш дарёси эстуарийи — дарёнинг денгизга қуйилиш ҳудуди остидан ўтган 9 километрлик туннелнинг икки қисмини туташтирди.
Туннел икки хил геологик муҳитда қазилди. Монмут тоғи остида қаттиқ тоғ жинслари, эстуарий остида эса юмшоқ грунт мавжуд эди.
Икки қисмни ажратиб турган сўнгги қатлам туннел қазиш комплекси ёрдамида қисқа вақт ичида очилди. Бироқ мутахассислар ушбу босқичга етиб келиш учун бир неча йил тайёргарлик кўрган.
Қурилиш экологик жиҳатдан сезгир ҳудудга таъсир қилиши мумкин эди. Шу сабабли EGP лойиҳаси жамоаси ишларни бошлашдан олдин уларни Скомиш туб аҳолиси вакиллари билан келишган.
Британия Колумбияси жанубий соҳилида жойлашган Skwelwilʼem қўриқланадиган эстуарий ҳудуди кўплаб ўсимликлар, балиқлар ва ёввойи ҳайвонларнинг яшаш муҳити ҳисобланади. Ушбу ҳудуд Скомиш халқи учун ҳам муҳим аҳамиятга эга.
Эстуарий юзасига зарар етказмаслик учун туннелни очиқ траншея қазимасдан, унинг остидан ўтказишга қарор қилинган. Бу мавжуд газ тизимини кенгайтириш билан бирга табиий ҳудудни сақлаб қолиш имконини берган.
Лойиҳани техник жиҳатдан амалга ошириш учун иккита турли туннел қазиш тизими ишлаб чиқилди. Улардан бири эстуарий остидаги юмшоқ грунтда, иккинчиси Монмут тоғи остидаги қаттиқ жинсларда ишлади.
Туннел қурилиши EGP лойиҳасининг энг мураккаб қисмларидан бири ҳисобланган.
Энди мутахассислар туннел қазиш комплексини олиб чиқиши ва иншоотни газ қувурларини ўрнатишга тайёрлаши керак.
