АҚШ президенти Доналд Трамп 22 сентябр куни Ню-Йоркда БМТ Бош Ассамблеясининг 81-сессиясида нутқ сўзлади. CNN, Reuters, NBC News, Newsquawk ва AP нашрлари Оқ уй раҳбари нутқидан иқтибослар келтирди.
Маъруза бу йилги «Ишончни тиклаш, ўзгаришларни бошқариш» мавзусидаги юқори даражадаги ҳафталикнинг асосий воқеаларидан бирига айланди. Нутқдан сўнг Трамп жаҳон етакчилари билан қатор икки томонлама учрашувлар ўтказди.
Эрон: келишув ёки «маҳв этиш»
Нутқнинг асосий мавзуси Эрон бўлди. Трамп жиддий танлов олдида турганини айтди:
«Мен муҳим қарор қабул қилишим керак. Эрон билан келишувга эришиб, уларга тикланиш ва аввалгига қараганда анча буюкроқ мамлакатни, эҳтимол, Яқин Шарқдаги ёки ҳатто дунёдаги энг буюк давлатлардан бирини барпо этиш имконини бераманми? Ёки мен Эронни йўқ қиламанми ва буни тезда, уларга яна одамларни ўлдириш ва мамлакатларни вайрон қилиш имкониятини бермасдан қиламанми? Ёки мен уларни тирик қолиш имкониятисиз ва келажак авлодлар учун буюклик умидисиз дўзахга маҳкум этаманми?».
Унинг сўзларига кўра, Эрон билан келишув «сайловдан сўнг дарҳол» — яъни АҚШ оралиқ сайловларидан сўнг тузилиши мумкин.
Куба: «режим қулайди»
Куба ҳақида гапирар экан, Трамп шундай деди: «Менинг маъмуриятим, шунингдек, коммунистик режим ўз тарихидаги энг кучли босим остида бўлган Кубадаги вазиятни тубдан ўзгартиришга интилмоқда. Бу мутлақо барбод бўлган давлат... У ҳар қачонгидан ҳам кўпроқ муваффақиятсизликка учрамоқда ва у қулайди». Бу сўзлардан кейин Куба делегацияси мажлислар залини намойишкорона тарк этди. Трампнинг таъкидлашича, ҳозир Ҳавана билан музокараларни давлат котиби Марко Рубио олиб бормоқда: «У Куба билан музокараларга жиддий киришган».
Украина ва Россия
Трамп Россия ва Украина раҳбарлари билан яқиндан ҳамкорлик қилаётганини ва можарони тугатишга эришиш ниятида эканини айтди — унинг сўзларига кўра, «бу албатта ва тезда содир бўлади».
Гренландия
Президент АҚШ оролда иккита йирик ҳарбий база қуришини ва Дания билан келишув шу куниёқ имзоланишини тасдиқлади. У, шунингдек, Гренландия бўйича келишувни НАТО мавқеини мустаҳкамлаш билан боғлади: «Американинг Арктика ва Шимолий Атлантикадаги иштирокини кенгайтириш орқали бу келишув нафақат АҚШ, балки Европани ҳам ҳимоя қилади ва кўп жиҳатдан НАТО мавқеини мустаҳкамлайди».
