Naked Science нашри Visual Capitalist инфографикасига таяниб хабар беришича, рейтинг ОПЕКнинг 2026 йилги йиллик статистик бюллетени маълумотлари асосида тузилган. Ҳисоб-китобларга хом нефт, жумладан, газ конденсати ҳамда нефт маҳсулотлари киритилган.
Рейтингда экспорт чегириб ташланмаган ялпи импорт ҳажми акс эттирилган. Шу сабабли импорт қилинган нефтнинг бир қисмини қайта ишлаб, яна хорижга сотадиган Сингапур ва Нидерландия каби давлатлар ҳам юқори ўринлардан жой олган.
Хитой етакчи, АҚШ иккинчи ўринда
Хитойнинг 2025 йилдаги нефт ва нефт маҳсулотлари импорти кунига 13,8 миллион баррелни ташкил этган. Бу иккинчи ўриндаги АҚШ кўрсаткичидан қарийб икки баравар кўп. Хитойнинг фақат хом нефт импорти эса кунига рекорд даражадаги 11,6 миллион баррелга етган.
АҚШ йирик импортчи бўлиши билан бирга, катта ҳажмда нефт ва нефт маҳсулотлари экспорт ҳам қилади. 2025 йилда мамлакатнинг ушбу экспорти кунига 10,7 миллион баррелни ташкил этган.
Америка нефтни қайта ишлаш заводларининг кўпчилиги дастлаб оғир нефтни қайта ишлашга мўлжаллаб қурилган. Шу боис АҚШ хориждан нефт сотиб олишда давом этмоқда. Америка импортининг қарийб 57 фоизи Канада ҳиссасига тўғри келади. Айни пайтда енгилроқ сланец нефти ва ортиқча ёнилғи ҳажмлари экспортга йўналтирилади.
Йирик импортчилар бешлиги
Рейтингда учинчи ўринни кунига 6,2 миллион баррел импорт билан Ҳиндистон эгаллаган. Ундан кейин Жанубий Корея — 3,8 миллион баррель ва Япония — 3,3 миллион баррел билан қайд этилган.
Хитой, АҚШ, Ҳиндистон, Жанубий Корея ва Япония биргаликда жаҳон нефт импортининг 46 фоизини ташкил этган.
Биринчи бешликдан ташқарида Сингапур ва Нидерландиянинг кўрсаткичлари ҳам юқори. Улар мос равишда кунига 2,8 миллион ва 2,7 миллион баррел импорт қилган. Ҳар икки мамлакат йирик нефтни қайта ишлаш ва савдо маркази бўлиб, олиб кирилган нефтнинг салмоқли қисмини қайта ишлаб, реэкспорт қилади.
Осиё Ҳўрмуз бўғозидаги узилишларга сезгир
2025 йилда Осиё–Тинч океани минтақаси мамлакатлари кунига 38,2 миллион баррел нефт ва нефт маҳсулотлари импорт қилган. Бу жаҳон кўрсаткичининг 50,1 фоизига тенг.
