Renault компанияси 1960-йиллардаги Renault 8 Gordini спорт седанидан илҳомланган концептуал купени намойиш этди. Алақачон ишлаб чиқарилаётган R4 ва R5 ретро моделларидан фарқли ўлароқ, бу концепт оммавий ишлаб чиқарилмайди, аммо унинг дизайнидаги айрим элементлар келажакдаги моделларга асос бўлиши мумкин.
Асл Renault 8 Gordini 1964 йилда тоғ йўллари учун мўлжалланган, орқа двигателли ва орқа ғилдираклари етакчи бўлган оилавий седаннинг кучайтирилган версияси сифатида дебют қилган. Модел деярли икки баравар кўп қувват, пасайтирилган клиренс, кучайтирилган тормозлар, тўртта ёки олтита думалоқ фара, шунингдек, оқ пойга чизиқлари тортилган ўзига хос кўк рангга эга бўлганди.
Янги Р8 Gordini Concept — паст ва кенг силуэтли икки ўринли электр купе. Олд томонда радиатор панжараси бўлмаган, олтита думалоқ LED фарали V-симон капот ажралиб туради. Орқа чироқлар кузов билан бир текисда жойлашган бўлиб, улар ёнмаганида деярли сезилмайди. Ташқи элементлар қаторига ҳаво тортгичли спорт бампери, кенгайтирилган ғилдирак аркалари, орқа устунлардаги қотирмалар, томдаги спойлер, орқа томондаги вентиляция панжараси ва катта диффузор ҳам киради. Кузов карбон билан безатилган ва анъанавий кўк-оқ рангга бўялган.
Renault жуда кам техник тафсилотларни маълум қилди. Концепт 266 от кучига эга битта электромотор билан жиҳозлангани ва у тортиш кучини орқа ўққа узатиши маълум.
Компания маълумотларига кўра, дизайнерлар 300 дан ортиқ эскиз тайёрлаган. Асосий мақсад «ҳам меросга, ҳам замонавийликка таянган ҳолда ҳиссиётларни уйғотиш» бўлган.
Шу билан бирга, концепт оммавий ишлаб чиқарилмайди. Оммавий премьера Renault Carwalk тадбирида бўлиб ўтади, шундан сўнг купе Париж автосалонида намойиш этилади. Кейинчалик концепт Renault Collections музейига топширилади.
