Audi электромобиллар орасида юриш захираси бўйича янги рекорд ўрнатди. Ралли бўйича Европа чемпиони Мико Марчик Audi А6 Sportback e-tron аккумуляторининг битта қуввати билан 1338 км йўл босди. Ўртача энергия сарфи 100 км га 7,09 кВт·соатни ташкил этди.
Таққослаш учун: ушбу моделнинг аралаш циклда эълон қилинган юриш масофаси 681 дан 776 км гача. Марчикнинг таъкидлашича, синов сафари Полша бўйлаб умумий фойдаланишдаги йўлларда, баъзан тиғиз пайтда, тирбандликларда бўлиб ўтган.
Рекорд сафарда орқа ўқида битта электр мотори бўлган А6 Sportback e-tron Performance версияси ишлатилди. Унинг қуввати 362 от кучига, айлантирувчи лаҳзаси 565 Н·м га тенг. Автомобил 100 км/соат тезликка 5,4 сонияда чиқади, максимал тезлиги эса 210 км/соатни ташкил этади.
Аввалги рекордни 2025 йилда Lucid Air Grand Touring 1205 км масофани босиб ўтиб ўрнатган эди.
Ушбу натижа туфайли Марчик ҳам ички ёнув двигателли, ҳам электр куч қурилмасига эга автомобиллар бўйича Гиннес рекордлари соҳибига айланди. 2025 йилда у Skoda Superb автомобилида битта ёнилғи бакида босиб ўтилган максимал масофа бўйича рекорд ўрнатган эди. Ўшанда у 100 км га ўртача 2,6 л ёнилғи сарфлаб, 2831 км йўл босишга муваффақ бўлганди.
