DW хабарига кўра, рақамли товламачилик билан шуғулланувчи ShinyHunters гуруҳи 22 сентябр куни даркнетдаги сайтида ва Reuters билан онлайн мулоқотда ФТБга киберҳужум уюштирганини даъво қилган.
Гуруҳ буни ФТБнинг 2026 йил май ойида эълон қилган огоҳлантиришига жавоб деб атаган. Ўша хабарда ҳакерларнинг ишлаш усуллари батафсил баён қилиниб, товламачиларга пул тўламаслик тавсия этилган эди.
ShinyHunters ўз баёнотида «деярли барча ФТБ агентлари ва бюрога ишга кириш учун ариза берган шахслар» ҳақидаги маълумотларни қўлга киритганини айтган. Бироқ бу даъвонинг кўлами тасдиқланмаган.
Ишга қабул сайтида узилишлар кузатилган
Хакерлар далил сифатида ФТБнинг ишга қабул қилишга мўлжалланган FBIjobs.gov сайти ўзгартирилганини кўрсатувчи скриншотни тақдим этган. Шунингдек, улар қарийб 5 минг агентга оид маълумотни ўғирланган базанинг бир қисми сифатида кўрсатган.
Reuters скриншотнинг ҳақиқийлигини текшира олмаган. Аммо агентлик сайт фаолиятида яқинда узилишлар бўлганини қайд этган.
ФТБнинг 22 сентябрдаги хабарида FBIjobs.gov ва махсус агентликка номзодлар учун мўлжалланган Special Agent Applicant Portal вақтинча ишламаётгани билдирилган.
ShinyHunters тақдим этган намунада ФТБ агентларининг исмлари, уй манзиллари, ижтимоий суғурта рақамлари, лавозимлари ва айрим ҳолларда оила аъзоларининг исмлари бўлгани айтилмоқда.
Reuters маълумотларнинг бир қисмини текширган
Reuters журналистлари тақдим этилган маълумотларни кредит бюроларидаги ахборот ва даркнет маълумотларини таҳлил қилувчи District 4 Labs компаниясида сақланаётган аввалги сизиб чиқишларга оид маълумотлар билан солиштирган.
Камида 10 та ҳолатда, жумладан, ФТБ директори Кэш Пателга оид маълумотларда мосликлар аниқланган. Вазиятдан хабардор манба агентликка айрим шахсларнинг лавозимлари ҳақидаги маълумотлар ҳам тўғри эканини билдирган.
Бироқ Reuters ушбу маълумотлар қаердан олинганини ва улар ҳакерлар айтганидек, ФТБнинг ички тизимларидан ўғирланганини аниқлай олмаган. Намунада маълумотлари келтирилган шахслар билан боғланишга уринишлар ҳам натижа бермаган.
