Исроилдаги сайлов: ғолиб йўқ
Исроилда 27 октябр куни бўлиб ўтган парламент сайловида ҳеч бир блок ҳукумат тузиш учун етарли ўрин ололмаяпти.
Reuters’нинг ёзишича, сайловда фаоллик 77,7 фоизни ташкил этган. Марказий сайлов комиссиясига кўра, бу 1999 йилдан бери энг юқори кўрсаткич.
Экзит-полларга кўра, Исроил бош вазири Бинямин Нетаняҳунинг «Ликуд» партияси 27 ўрин билан етакчилик қилмоқда. Собиқ Бош штаб бошлиғи Гади Айзенкотнинг «Яшар» партияси эса 20–22 ўрин олиши кутилмоқда. Бироқ 120 ўринли Кнессетда Нетаняҳу блоки ҳам, Айзенкот бошчилигидаги мухолифат ҳам 61 ўринга етмаяпти. Араб партияларида рекорд натижа – 18–19 ўрин олиши мумкин.
Расмий санoқ давом этмоқда. Якуний натижалар бир неча кун ичида маълум бўлади.
Нетаняҳу «кучли, ўнг, миллий ҳукумат» тузиш кераклигини айтди. «Сионизмга қарши араб партияларига таянадиган ҳукумат тузиб, Исроилни хавф остига қўйиш мутлақо мумкин эмас», деди у.
Айзенкот эса халқ ўзгариш учун овоз берганини айтиб, Нетаняҳуни истеъфога чиқишга чақирди.
Ҳар икки етакчи араб партиялари билан ҳукумат тузишни рад этганди. Якуний натижалардан сўнг Исроил президенти партиялар билан маслаҳатлашиб, ҳукумат тузишни бир номзодга топширади. Бунинг учун 42 кун муддат берилади.
Европадан Путинга қўнғироқ
Европа Украинадаги уруш бўйича музокараларда ўз ўрнини топишга уринмоқда. 27 октябр куни Финландия президенти Александр Стубб ва Норвегия бош вазири Йонас Гар Стёре Россия президенти Владимир Путинга қўнғироқ қилиб, уни урушни тугатишга чақирди.
Стёренинг айтишича, суҳбат 90 дақиқача давом этган. Шундан сўнг икки раҳбар Украина президенти Володимир Зеленский билан ҳам гаплашган. Улар бу ташаббусни ноябр ойида Абу-Дабида бўлиши кутилаётган Россия, Украина ва АҚШ вакиллари музокараси билан боғлади. Бу томонларнинг феврал ойидан бери илк учрашуви бўлади.
«Биз Россияга қўшни давлатлармиз. Бу уруш натижаси бизнинг ва бутун Европа хавфсизлигига бевосита таъсир қилади», деди Стубб.
Кремл баёноти эса Путин позициясида юмшаш йўқлигини кўрсатди. Унга кўра, адолатли ва узоқ муддатли тинчликка фақат Россиянинг қонуний манфаатлари тўлиқ ва сўзсиз ҳисобга олинсагина эришиш мумкин.
Украина ТИВ раҳбари Андрей Сибига қўнғироқ Киев билан келишилганини айтди. Дания ва Швеция бош вазирлари эса бу ташаббусга шубҳа билан қаради.
