Испанияда поездлар тўқнашуви
Испанияда бу йил иккинчи марта йирик поезд ҳалокати юз берди. 28 октябр куни Мадриддан жанубда, Толедо шаҳри яқинида тезюрар поезд йўлда тўхтаб турган бошқа поездга бориб урилди.
Ҳалокатда камида 68 киши ҳалок бўлди, 80 киши жароҳат олди. Уларнинг 15 нафари оғир аҳволда. Тўқнашув пайтида тўхтаб турган Iryo поездида 147, унга келиб урилган Renfe поездида эса 397 йўловчи бўлган. Камида учта вагон темирйўл кўтармасидан пастга қулаб тушган. Қутқарувчилар ҳамон вагонлар орасидан қурбонларни қидирмоқда.
Испания транспорт вазирининг айтишича, компютер алоқа тизимидаги узилиш сабаб қизил сигнал ёниб, ҳаракат автоматик равишда тўхтаган. Бироқ шундан сўнг Renfe поездини яна йўлга чиқариш ҳақида хато қарор қабул қилинган. Renfe ўз поезди рухсат олганидан кейин ҳаракатни давом эттирганини маълум қилди. Темирйўл инфратузилмаси оператори эса ҳозирча изоҳ бермади.
Испания бош вазири Педро Санчес фожиа текширилишини ва аниқланган камчиликлар бартараф этилишини маълум қилди.
«Тезюрар темирйўл тизимимизга ишончни тиклаш учун хавфсизликни янада кучайтириш керак бўлса, шундай қиламиз. Чунки Испаниядек мамлакат бир йилда иккита тезюрар поезд ҳалокатини бошдан кечириши қабул қилиб бўлмайдиган ҳол», деди у.
2026 йил январда худди шу йўналишда, шу компанияларнинг поездлари иштирокидаги ҳалокатда 46 киши ҳалок бўлганди. Ўшанда поезд издан чиқиб, қарама-қарши томондан келаётган поездга урилган.
Путин: «Маск – ҳақиқий даҳо»
Россия АҚШнинг Starlink тизимига муқобил сунъий йўлдош интернетини яратишга киришди, бироқ бу борада ҳали анча ортда қолмоқда. Россия президенти Владимир Путин 28 октябр куни буни тан олиб, Илон Маскни даҳо деб атади.
Путин Москвадаги Россия-Африка саммити доирасида рақамли ривожланиш вазири тақдимотини тинглади. Вазир Россия «Рассвет» лойиҳаси доирасида 30 дан ортиқ сунъий йўлдош учирганини маълум қилди.
«Бир дақиқа, шуни таъкидламоқчиман: бу бизнинг илк қадамимиз. Илон Маск даҳо, у ҳақиқий даҳо», деди Путин.
Путиннинг саволига жавобан вазир Маскнинг 5 мингдан ортиқ сунъий йўлдоши ишлаётганини айтди. BBC'га кўра аслида бу рақам анча катта – Starlink тизими 13 мингга яқин сунъий йўлдош учирган.
