Binance’га ҳакерлар ҳужуми
Криптовалюта бозорида йирик ҳакерлик ҳужуми юз берди. 29 октябр куни дунёдаги энг йирик криптобиржа – Binance хавфсизлик тизими бузилгани оқибатида тахминан 6,3 млрд долларлик зарар кўрди. Таҳлилчилар бу тарихдаги энг йирик крипто ўғирлик бўлиши мумкинлигини айтмоқда.
Биржанинг дастлабки текширув натижаларига кўра, ҳужум компания муҳандисларидан бирининг бузиб кирилган ноутбугидан бошланган бўлиши мумкин. Шу орқали ҳакер тизимлардан бирига кириб, рухсатсиз маблағ ечиб олган.
Binance ҳамкорлари билан бирга ўғирланган активларни музлатганини ва ҳозирча уларнинг 3 млрд доллари топилганини билдирди. Қолган 3,3 млрд доллар тақдири ҳақида эса маълумот берилмади.
«Фойдаланувчилар маблағлари хавфсиз. Эҳтиёт чораси сифатида барча депозит ва пул ечиш операциялари вақтинча тўхтатилди», дейилади биржа баёнотида. Binance ҳаммуассиси эса компания ҳакерлар етказган барча зарарни қоплашини айтди.
Ҳодисадан сўнг крипто бозорида нархлар тушиб кетди. 30 октябр куни эрталаб Осиё савдоларида биткоин 3 фоиздан кўпроқ арзонлаб, сўнгги олти ҳафтадаги энг паст даражага – 76,3 минг долларга тушди. Ethereum ҳам 3 фоиздан зиёд қадрсизланди.
Binance дунё бўйлаб 335 млн рўйхатдан ўтган фойдаланувчига эга. Маълумотларга кўра, 2025 йилда 150 га яқин турли ҳужумларда ҳакерлар жами 2,9 млрд долларлик криптовалютани ўғирлаган.
Россия-Украина уруши
29 октябр куни Украина марказидаги Днипро шаҳри темирйўл вокзалига Россиянинг реактив дрони урилди. Оқибатда одам гавжум перронда камида 14 киши ҳалок бўлди. Вилоят раҳбари сўзларига кўра, яна 14 киши, жумладан, 11 ёшли бола жароҳатланган.
Украина давлат темирйўл компанияси хабарига кўра, зарба пайтида перронлардан бирида жанубдаги Запорижжя шаҳрига кетаётган йўловчи поезди турган.
Украина президенти Володимир Зеленский АҚШ, Европа ва G7 давлатларини Россияга қарши янги санкциялар жорий этишга чақирди. У октябр ойида Трамп ва Путин ўртасида тузилган келишувни ҳам яна бир бор танқид қилди.
Шу куни Россия бошқа шаҳарларга ҳам зарба берди. Шимолдаги Черниҳив шаҳри марказига уюштирилган ракета ҳужумида 15 ёшли икки қиз ўлдирилди, камида 25 киши жароҳатланди. Полтава вилоятидаги Кременчук шаҳрида эса турар жой бинолари ва мактабга урилган дрон ҳужумида уч киши ўлдирилди, 28 киши жароҳатланди.
