DW хабарига кўра, Кайзерслаутерн прокуратураси бу ҳақда 29 сентябр куни маълум қилган.
Тергов версиясига кўра, гумонланувчилар 2022 йил кузидан 2024 йил охиригача Россияга 53 та енгил автомобил ва ярим тиркамаларни тортишга мўлжалланган олтита тягач экспорт қилган. Етказиб беришларни яшириш учун учинчи мамлакатлар, жумладан, Беларус, Қирғизистон ва Гуржистондан фойдаланилгани айтилмоқда.
Тинтувлар 8 сентябр куни Германиянинг Рейнланд-Пфалц еридаги Нойштадт-ан-дер-Вайнштрассе шаҳри ҳамда Австрия пойтахти Венада тадбиркорларнинг турар жойлари ва тижорат биноларида ўтказилган. Амалиётда Германия, Австрия ва Белгия ҳуқуқ-тартибот органлари иштирок этган.
Прокуратура илтимосномаси асосида Кайзерслаутерн суди гумонланувчиларнинг тахминан 7 миллион евролик мол-мулкини хатлашга рухсат берган. Бу сумма ноқонуний экспортдан олингани тахмин қилинаётган даромадга тенг.
Германиядаги тинтувларда Porsche ва Mercedes-Benz русумли иккита автомобил, Австрияда эса 85 минг евро нақд пул олиб қўйилган. Германия, Австрия ва Белгиядаги банк ҳисобларида яна 278 минг евро блокланган.
Бундан ташқари, Нойштадтдаги тадбиркорнинг биносидан учта ов милтиғи ва ўқ-дорилар топилган. Шу сабабли унга нисбатан қурол тўғрисидаги қонунчиликни бузганлик эҳтимоли юзасидан ҳам тергов бошланган.
Прокуратурага кўра, ҳар икки гумонланувчи ҳозирча сукут сақлаш ҳуқуқидан фойдаланган. Тергов давом этмоқда.
Германияда шунга ўхшаш ишлар бўйича ҳукмлар чиқарилган
DW эслатишича, март ойида Вюрцбург суди бавариялик автодилерни санкцияларни бузиб, Россияга 111 та люкс тоифадаги автомобил етказиб бергани учун олти йилга озодликдан маҳрум қилган. Тергов маълумотларига кўра, бу машиналар Россия Федерал хавфсизлик хизмати, Федерал қўриқлаш хизмати, «Роснефть» компанияси ва президент маъмурияти ходимларига етказилган.
2025 йил июлида эса Гессендаги автосалон ходими Россияга санкцияларни четлаб 71 та люкс автомобил сотгани учун беш йиллик қамоқ жазосига ҳукм қилинган.
2025 йил майида Германия прокурорлари қимматбаҳо автомобилларни Россияга етказиш билан боғлиқ 40 дан ортиқ ишни тергов қилаётгани хабар қилинган. Бироқ экспертлар яширин етказиб беришларнинг фақат кичик қисмига чек қўйилаётганини таъкидлаган.
