«Тошкент шаҳар йўловчи ташишни мониторинг ва назорат қилиш» давлат муассасаси хабарига кўра, воқеа 15 август куни Чилонзор туманида ўтказилган назорат рейди вақтида содир бўлган.
Назоратчилар автобусдан бекатга тушган М.М.дан йўл ҳақи тўланганини тасдиқловчи ҳужжатни кўрсатишни сўраган. Муассаса маълумотига кўра, йўловчи турли важларни келтириб, назоратчи талабини бажармаган ва қаршилик кўрсатган.
Унинг шахсига аниқлик киритиш жараёнида йўловчи жанжал чиқариб, назоратчига куч ишлатишга уринган. Ҳолат боди камера орқали қайд этилган.
Мазкур иш 24 сентябр куни жиноят ишлари бўйича Чилонзор туман судида очиқ суд мажлисида кўриб чиқилган. Суд М.М.га уч сутка маъмурий қамоқ жазоси тайинлаган.
Муассаса йўловчилар автобусга чиқиши билан йўл ҳақини тўлаши шартлигини эслатган. Хабарда қайд этилишича, тўловни амалга оширмаган йўловчилар чиптасиз ҳаракатланаётган деб ҳисобланади ва уларга Маъмурий жавобгарлик тўғрисидаги кодекснинг 144-моддаси 5-қисми асосида жарима қўлланади.
Шунингдек, муассаса назоратчиларга ҳужум қилиш, зўравонлик билан таҳдид қилиш ва уларни ҳақоратлаш қонунчиликда белгиланган жавобгарликка сабаб бўлишини таъкидлаган.
