Украина президенти Володимир Зеленский 8 октябр куни журналистларга делегациянинг АҚШга ташрифи ҳақида маълум қилган.
Унинг сўзларига кўра, музокараларда Украина номидан Президент офиси раҳбари Кирилл Буданов, унинг ўринбосари Сергей Кислица, парламентдаги «Халқ хизматкори» фракцияси раиси Давид Арахамия ҳамда Ташқи разведка хизмати раҳбари Рустем Умеров иштирок этади.
Зеленский Европа вакиллари ҳам музокараларга қўшилиши мумкинлигини айтган.
Юқори мартабали америкалик амалдорга таяниб хабар берилишича, учрашувда «можаронинг барча жиҳатларини қамраб олувчи ва урушни тугатишни мақсад қилган» янги таклиф кўриб чиқилади. Ҳозирча унинг батафсил шартлари очиқланмаган.
Зеленский Рубионинг «боши берк кўча» ҳақидаги фикрини танқид қилди
Шу куни Зеленский АҚШ давлат котиби Марко Рубионинг Украинадаги уруш боши берк кўчага кириб қолгани ва музокаралар орқали ечим топиш истиқболлари кўринмаётгани ҳақидаги баёнотига ҳам муносабат билдирган.
Рубио бу фикрларни Грециянинг Kathimerini газетасига берган интервюсида айтган.
Зеленскийнинг таъкидлашича, бир томондан Россия билан келажакдаги иқтисодий лойиҳалар ҳақида гаплашиб, иккинчи томондан дипломатик имкониятлар тугаганини айтиш тўғри эмас.
«Биз дипломатик боши берк кўчада эмасмиз», — деган Украина президенти.
У Вашингтонни Россияга иқтисодий босимни кучайтиришга, савдо орқали уни қўллаб-қувватламасликка ва қурол-яроғига қарши санкциялар жорий этишга чақирган.
Starlink бўйича ҳам мурожаат қилинди
Зеленский АҚШдан Украинага Россия ҳудуди устида Starlink тизимидан фойдаланишга рухсат беришни ҳам сўраган.
Унинг фикрича, бу Украинага ҳавода устунликка эришишга ёрдам беради ва охир-оқибат Владимир Путинни музокаралар столига ўтиришга мажбур қилиши мумкин.
«Яндекс» дата-марказига зарба ҳақида нима деди?
Украина президенти Россиядаги дата-марказларга зарбалар ҳақида ҳам гапирган. У бу ҳаракатларни Россиянинг Украинадаги шундай объектларга ҳужумларига жавоб сифатида изоҳлаган.
