Инфографикада Европанинг 42 мамлакатидаги энг йирик оммавий савдога қўйилган компаниялар келтирилган. Улар бош қароргоҳи жойлашган давлат бўйича ажратилган ва бозор капиталлашуви асосида баҳоланган.
Рейтинг учун StockAnalysis ҳамда миллий фонд биржаларининг 2026 йил сентябр охиридаги ёки энг сўнгги мавжуд савдо кунидаги маълумотларидан фойдаланилган. Бозор капиталлашуви компания акцияларининг жами бозор қийматини англатади.
ASML нега бунчалик қиммат?
ASML илғор микрочипларни ишлаб чиқаришда қўлланадиган ўта қисқа тўлқинли ултрабинафша нурли литография — EUV тизимларининг ягона етказиб берувчиси сифатида яримўтказгичлар саноатида муҳим ўрин тутади.
Рейтингга кўра, у 42 мамлакат етакчилари орасидаги ягона технологик компаниядир. Бозор капиталлашуви бўйича эса дунёда 20-ўринни эгаллаган.
ASML'нинг 670 миллиард долларлик қиймати Буюк Британия етакчиси HSBC банкининг 342,4 миллиард долларлик ва Швейцария етакчиси Roche компаниясининг 341,5 миллиард долларлик қийматидан қарийб икки баробар юқори.
Европанинг аввалги етакчиси қийматининг 70 фоизидан кўпроғини йўқотган
Даниянинг Novo Nordisk компанияси 2024 йилда Европанинг энг қиммат компанияси бўлган. Ўшанда унинг бозор қиймати 650 миллиард доллардан ошган.
Янги рейтингда эса Ozempic ва Wegovy препаратларини ишлаб чиқарувчи компаниянинг капиталлашуви 168,6 миллиард доллар деб кўрсатилган. Бу аввалги юқори кўрсаткичга нисбатан 70 фоиздан ортиқ пасайишдир.
Мақолада бу ўзгариш Eli Lilly компаниясининг рақобатчи Mounjaro ва Zepbound препаратлари бозордаги улушини кенгайтираётгани билан изоҳланган. Шунга қарамай, Novo Nordisk Даниянинг энг қиммат компанияси бўлиб қолмоқда.
Кўп мамлакатларда банклар етакчи
Европанинг 15 мамлакатида энг катта бозор қийматига эга компания — банк. Суғурта ва инвестиция компаниялари ҳам қўшилса, молия сектори 18 мамлакатда етакчилик қилади.
Яна 10 мамлакатда биринчи ўрин энергетика ва коммунал хизматлар компанияларига тегишли. Демак, молия ҳамда энергетика-коммунал хизматлар соҳалари 42 миллий етакчининг 28 тасини ташкил этади.
