Европа компаниялари жавоб чораларидан хавотирланиши керакми, деган саволга Паздер «Бу содир бўлиши мумкин ва Америка бозорининг ҳажмини ҳисобга олганда, бу улар учун вайронкор оқибатлар келтириб чиқаради», деб жавоб қайтарди.
Элчининг фикрича, АҚШда бу пойгада ғалаба қозониш учун барча зарур имкониятлар мавжуд.
«Бироқ Европа билан урушиш ўрнига ҳамкорлик қилишимиз осонроқ бўларди», — деди у.
АҚШнинг бу огоҳлантириши Еврокомиссия сунъий йўлдошлар орқали смартфонларга тўғридан-тўғри алоқа хизматларини кўрсатиш учун радиочастоталарни тақсимлаш қоидаларини ўзгартириш режаларини ишлаб чиқаётган бир пайтда янгради.
Таклифга кўра, 2 ГГц частота диапазонининг бир қисми давлат хизматлари учун, қолган қисми эса тижорат мақсадларига ажратилади. Бунда тижорат спектридан фойдаланиш Европа операторларига устунлик берадиган тарзда тартибга солинади. Бу эса SpaceX, жумладан, Starlink тармоғини бошқараётган Америка ҳамда Хитой компанияларининг имкониятларини чеклаши мумкин.
Европада радиочастота спектрини тақсимлашга киритилиши таклиф этилаётган ўзгаришлар SpaceX компаниясининг кескин танқидига сабаб бўлди. Компания бу Украинада алоқа сифати ёмонлашишига олиб келиши мумкинлигидан огоҳлантирди.
Шу билан бирга, аввалроқ ЕИнинг ташқи ишлар ва хавфсизлик сиёсати бўйича вакили Кая Каллас Европа Иттифоқи қисқа муддат ичида Украинани Starlink сунъий йўлдош алоқа тизимига муқобил технологик ечим билан таъминлаш имкониятига эга эмаслигини таъкидлаганди.
