Панорама Mastcam камераси ёрдамида 11 август куни — миссиянинг 4982-марс кунида олинган. Марсдаги бир сутка «сол» деб аталади. Тасвирлар Ерга юборилгач, ягона панорамага бирлаштирилган.
Суратнинг олд қисмида кўкимтир туслар кўзга ташланади. Уфқдаги ярданглар — шамол эрозияси шакл берган қоялар эса ёрқин тонгги нур билан ёритилган.
Curiosity’нинг Mastcam камерасида олинган кўплаб суратларидан фарқли равишда, бу панорамага ишлов беришда оқ ранг баланси тузатилмаган. Шу туфайли Марс манзарасининг эрта тонгдаги табиий туслари сақлаб қолинган.
Ярданглар қатлами Шарп тоғининг шимоли-ғарбий қисмида тахминан 16 километрга чўзилган. Баландлиги қарийб беш километр бўлган ушбу тоғ ёнбағирларига Curiosity 2014 йилдан буён кўтарилиб келмоқда.
Яқинда аппарат яна бир муҳим натижага эришган: унинг йўл давомида баландлик бўйича кўтарилиши бир километрга етган. Бу Марсда ҳаракатланган марсоходлар учун энг катта кўрсаткич сифатида қайд этилмоқда.
Олимлар Curiosity ярдангларга яқинлашгани сари янада батафсил тасвирларни олишга умид қилмоқда. Уларнинг асосий мақсадларидан бири — бу ғайриоддий қоялар қандай шаклланганини аниқлаш.
Шарп тоғи кўплаб қатламлардан ташкил топган бўлиб, ҳар бири Марс тарихининг муайян даври ҳақида маълумот беради. Уларни ўрганиш орқали олимлар миллиардлаб йиллар аввал бу ҳудудда кўллар ва сув оқимлари бўлганини яхшироқ тушуниб олган.
Вақт ўтиши билан сув қуриб, туз минералларини қолдирган. Тоғда янги ётқизиқлар тўпланиши тўхтаганидан кейин шамол материалнинг бир қисмини аста-секин емириб кетган бўлиши мумкин. Ярданглар шу жараён натижасида шакллангани тахмин қилинмоқда.
Ҳозир Curiosity ўзининг бешинчи узайтирилган миссиясининг иккинчи йилида ишламоқда. Мазкур босқич ўргимчак тўрига ўхшаш, катаксимон тузилиш ҳосил қилувчи қирларни ўрганишдан бошланган.
Келгуси бир йил атрофида марсоход асосан сулфат ва карбонат минералларига бой қатламлар бўйлаб ҳаракатланади. Бу қатламлар Марсдаги қадимги муҳит ва сувнинг қуриб бориши ҳақида қўшимча маълумот бериши кутилмоқда.
Олимлар Curiosity 2027 йил давомида ярданглар этагига етиб боришига умид қилмоқда. Ўшанда аппарат роботлаштирилган қўли ёрдамида ушбу қояларни бевосита ўрганиб, янги маълумотлар тўплаши мумкин.
