Марсоход атрофни оқ-қора навигация камералари ёрдамида суратга олган. Биринчи панорама 2026 йил 30 августда, Марснинг маҳаллий вақти билан соат 09:56 да — Curiosity миссиясининг 5000-солида олинган. «Сол» Марсдаги бир суткани англатади.
Иккинчи панорама эса 2 сентябрда соат 17:39 да, миссиянинг 5003-солида тасвирга туширилган.
Икки панорама Ерга узатилгач, мутахассислар уларни ягона тасвирга бирлаштирган. Натижада Марсдан юборилган ўзига хос «откритка» пайдо бўлган.
Кўк ва сариқ ранглар қаердан келган?
Панорамадаги ранглар камера қайд этган табиий ранглар эмас. Улар манзарани бадиий талқин қилиш ва турли вақтларда олинган тасвирларни ажратиш учун кейинчалик қўшилган.
Кўк ранг эрталаб олинган панорамани, сариқ эса куннинг иккинчи ярмидаги тасвирни ифодалайди. Curiosity суратларидан бундай «откриткалар» аввал ҳам тайёрланган.
Тасвирда марсоходнинг ўзи ҳам кўринади
Панораманинг олд қисмида Curiosity ва унинг бир қатор жиҳозлари акс этган. Улар орасида цилиндрсимон UHF антеннаси бор. У Марс орбитасидаги космик аппаратларга маълумот узатиш учун хизмат қилади.
Марсоходнинг орқа қисмида қовурғасимон элементларга эга MMRTG радиоизотопли термоэлектр генератори ҳам кўринади. У Curiosity'ни сайёра юзасида ишлаш учун зарур электр энергияси билан таъминлайди.
Curiosity ҳозир қаерда?
Марсоход Гейл кратери тубидан тахминан беш километр баландликка кўтарилган Шарп тоғининг қуйи ёнбағирларини ўрганмоқда.
Янги панорама тоғ ёнбағридан пастга — кратер туби томон йўналтирилган. Гейл кратерининг узоқдаги чеккаси эса уфқда зўрға кўринади.
