DW хабарига кўра, Валтонен 12 октябр куни X ижтимоий тармоғида бошқа аъзо давлатларни Еврокомиссияга йўллаган мурожаатига қўшилишга таклиф қилганини маълум қилди.
«Уларнинг мамлакати украиналикларнинг уйларини бомбалаётган бир пайтда россияликларнинг Европага келиб, бу ердаги турмуш тарзи ва эркинликлардан баҳраманд бўлиши нотўғри», — деган вазир.
Валтонен Финландия 2022 йилдаёқ россияликларнинг зарур бўлмаган сафарлари учун виза беришни тақиқлаганини таъкидлаб, худди шундай чора ЕИ миқёсида ҳам қўлланиши кераклигини айтган.
У, шунингдек, Россия президенти Владимир Путиннинг яқин доирасидаги шахсларга Шенген визаларини беришни тақиқлаш ва россиялик спортчиларга виза беришни чеклашни таклиф қилган. Украинага қарши урушда қатнашган россияликларга виза бериш тақиқини самарали қўллашга ҳам чақирган.
Россия фуқароларига нисбатан виза сиёсатини қатъийлаштириш ҳақида аввал ҳам таклифлар билдирилган. Сентябр ойида ЕИнинг ташқи ишлар ва хавфсизлик сиёсати бўйича олий вакили Кая Каллас Москванинг «гибрид ҳужумлари»га жавобан чекловларни кучайтириш, жумладан, туристик визалар сонини камайтириш зарурлигини айтган.
Эстония эса Украинага қарши урушда қатнашган собиқ россиялик ҳарбийларга виза беришни тақиқлаш ташаббусини илгари сурган. Кейинчалик бу чорани Болтиқбўйи ва Шимолий Европанинг бошқа давлатлари ҳам қўллаб-қувватлаган.
Июн ойида бир гуруҳ ЕИ давлатлари россияликларга туристик виза беришни тўхтатиш бўйича қўшма чақириқ билан чиққан. Улар имзолаган хатда 2025 йилда Россия фуқароларига Шенген ҳудудидаги 29 мамлакатга сафар қилиш учун 470 мингта виза берилгани қайд этилган. AFP агентлигига кўра, уларнинг кўпи кўп марталик кириш ҳуқуқини берган.
Австрия парламенти сайтида эълон қилинган ҳужжатга кўра, 14 октябрь куни ЕИ Кенгашида Россияга нисбатан виза сиёсатини муҳокама қилиш режалаштирилган.
