Украина-Америка келишмовчилиги
Украина расмийларининг маълум қилишича, Илон Маскнинг SpaceX компанияси ҳарбий мақсадларда фойдаланилувчи Starlink (Starshield) терминалларига огоҳлантиришсиз юқори тезлик чекловини ўрнатган. Бу ҳолат Киевнинг ҳужумкор ҳамда мудофаа тизимидаги дронлари миссияларини издан чиқармоқда.
Президент Володимир Зеленский ушбу қарорни кўплаб инсоний йўқотишларга олиб келувчи "катта хато" деб атади. Илон Маск эса тизим тезлиги ва фойдаланиш чекловлари АҚШ ҳарбийлари ҳамда бевосита президент Доналд Трамп томонидан белгиланишини таъкидлади.
"Президент Трамп бизнинг эмас, бошқа бир томонни танлаши оғриқли ҳолат", деди Зеленский Пирс Морганга берган интервюсида. У Трампнинг бетараф туришига қарши эмаслигини, бироқ "агар ўртада бўлса, ўртада қолиши кераклигини” таъкидлади.
Ушбу вазият Киев учун Starlink обуналарини молиялаштириб келаётган Полшанинг ҳам кескин эътирозига сабаб бўлмоқда.
Айни пайтда Россия Starlink'даги узилишлардан фойдаланиб, Киев, Харкив ва Лутск шаҳарларига йирик ракета ҳамда дрон ҳужумларини уюштирди. Зарбалар оқибатида камида 8 киши ҳалок бўлди, 30 та энергетика объекти шикастланди. Шунингдек, 600 мингга яқин аҳоли электр таъминотисиз қолди. Зеленский бу ҳужумларни Трамп эълон қилган "энергетика сулҳи"га нисбатан Россиянинг "ошкора ҳурматсизлиги" деб баҳолади.
Мазкур чекловлар Киев ва Вашингтон ўртасидаги муносабатлар ёмонлашган бир вақтга тўғри келмоқда. Трамп АҚШдаги сайловлар олдидан ёқилғи нархларини пасайтиришга уриниб, Россия дизелига санкцияларни бекор қилди. У Украинадан рус нефтни қайта ишлаш заводларига ҳужумларни тўхтатишни талаб қилмоқда. Шунингдек, украиналикларни Зеленскийни алмаштиришга чақирди.
Вашингтон билан таранглик фонида Буюк Британия Россиянинг реактив дронларига қарши курашиш учун Украинага қарийб 60 миллион долларлик "ер-ҳаво" синфидаги ракеталар пакетини ажратмоқда.
Ҳўрмуз яқинида икки кема чўкиб кетди
13–14 октябр кунлари Ҳўрмуз бўғози яқинида юз берган алоҳида ҳодисаларда битта контейнер ташувчи ва битта қуруқ юк ташувчи кема чўкиб кетди. Бу ҳақда хабар берган Reuters’га кўра, уларга снарядлар келиб урилган.
Хусусан, Сингапур байроғи остида сузувчи, кичик контейнер ташувчи “GFS Pride” кемаси бўғоз орқали сузиб ўтаётганда чўкиб кетган. Экипажнинг барча 21 нафар аъзоси хавфсиз эвакуация қилинган, дейилади Сингапур Денгиз ва порт бошқармаси баёнотида.
