Индекс Hinrich Foundation ва IMD Жаҳон рақобатбардошлиги маркази ҳамкорлигида ишлаб чиқилган. Баҳолаш учта асосий йўналиш бўйича 72 та кўрсаткични қамраб олади.
Умумий рейтингда 100 балл тўплаган Британия 2024 йилга нисбатан бир поғона юқорилаган. Сингапур икки поғона кўтарилиб, иккинчи ўринни эгаллаган. Кейинги ўринларда Янги Зеландия, Ҳонгконг ва Австралия жойлашган.
Айрим иқтисодиётлар сезиларли ўсиш кўрсатган. Малайзия тўрт поғона кўтарилиб 11-ўринга, Камбоджа тўрт поғона юқорилаб 15-ўринга чиққан. Шри-Ланка ҳам натижасини тўрт поғона яхшилаб, 22-ўринни эгаллаган.
Япония эса уч поғона пастлаб саккизинчи, Хитой уч поғона тушиб 19-ўринда қайд этилган.
Индекснинг иқтисодий йўналиши мамлакатларнинг халқаро савдо орқали ўсишни таъминлаш қобилиятини баҳолайди. Бунда экспорт бозорларининг қанчалик хилма-хиллиги ва давлат қарзининг ялпи ички маҳсулотга нисбати каби омиллар ҳисобга олинади.
Ушбу йўналишда Сингапур биринчи ўринни олган. АҚШ 2024 йилдаги тўртинчи ўриндан 2026 йилда иккинчи ўринга кўтарилган. Бироқ хабарда АҚШнинг тариф сиёсати ва унинг кенгроқ иқтисодий оқибатлари мамлакат натижасига салбий таъсир қилгани қайд этилган.
Ижтимоий йўналиш инсон капитали ривожини, жумладан, олий таълим билан қамров ва кутилаётган умр давомийлигини ҳисобга олади. Бу борада Австралия Канадани бироз ортда қолдириб, етакчи бўлган.
Экологик йўналишда табиий ресурслардан фойдаланиш самарадорлиги, қайта тикланувчи энергия манбалари ва аҳоли жон бошига карбонат ангидрид чиқиндилари каби кўрсаткичлар баҳоланади. Унда Янги Зеландия биринчи ўринни эгаллаган.
Камбоджа экологик йўналишда 2025 йилдаги 17-ўриндан 2026 йилда учинчи ўринга кўтарилган. Ҳонгконг саккизинчи ўриндан тўртинчига, Ветнам эса 13-ўриндан саккизинчига чиққан.
Индекс барча мамлакатларни қамраб олмайди ва иқтисодиётларнинг умумий қудратини баҳоламайди. У танлаб олинган 30 та иқтисодиётда халқаро савдонинг узоқ муддатли барқарорлигини таққослайди.
