DW хабарига кўра, 15 октябр куни Тиранада учинчи кун кетма-кет намойишчилар ва полиция ўртасида кескин тўқнашувлар юз берган. Норозилик акциялари Шкодер, Корча ва мамлакат жанубидаги соҳил шаҳарларида ҳам ўтказилган.
Тиранада айрим намойишчилар тош отган, дўконлар ойналарини синдирган, тўсиқлар қуриб, чиқинди қутиларини ёққан. Полиция уларга қарши сувпуркагичлар ва кўздан ёш оқизувчи газ қўллаган.
Шкодерда шаҳар ҳокимияти биносининг ойналари синдирилган, ҳукмрон Социалистик партия ҳамда мухолифатдаги Демократик партия офислари тошбўрон қилинган. Корчада эса мактаб биноларининг ойналари синдирилиб, кўчалар тўсиб қўйилган.
Соғлиқни сақлаш вазирлиги маълумотига кўра, 14 октябр куни шифохоналарда 89 кишига, жумладан, 61 нафар полиция ходимига тиббий ёрдам кўрсатилган. Полиция шу куни ходимлар, давлат идоралари ва мулкка ҳужумлар билан боғлиқ ҳолатлар юзасидан 65 киши қўлга олинганини билдирган. Бир кун аввал яна ўн киши ушлангани хабар қилинган.
Намойиш иштирокчилари юқори ўқиш тўловлари, университетлардаги ёмон шароитлар ва яшаш харажатларининг ошишидан норози. Улар 15 октябр куни бош вазирдан соат 13:00 гача истеъфога чиқишни талаб қилган. Ҳукумат бу талабга муносабат билдирмаган.
Эди Рама эса Тиранадаги университет кампусида ёниб кетган офисни кўздан кечиргани акс этган видеони эълон қилган. У вайронагарчиликларни талабалар қилганига шубҳа билдириб, зўравонлик учун мухолифатни айблаган.
Албанияда май охиридан буён ҳукуматга қарши норозилик акциялари мунтазам ўтказиб келинмоқда. Уларга туртки бўлган масалалардан бири — соҳилдаги муҳофаза этиладиган табиий ҳудудда ҳашаматли меҳмонхона қуриш режаси.
DW маълумотига кўра, лойиҳа Доналд Трампнинг қизи Иванка Трамп ва унинг турмуш ўртоғи Жаред Кушнер билан боғлиқ. Намойишчилар лойиҳа юзасидан қарорлар қабул қилишда шаффофлик етишмаслиги ва эҳтимолий коррупцияга қарши ҳам чиқмоқда.
