DW хабарига кўра, 25 октябр куни ўтказилган акцияни «Демократия учун миллион лаҳза» ташаббуси ташкил этган. Иштирокчилар «Цензура қайтишини истамаймиз!» ва «Кибр ва вайронкорлик ҳукуматини тўхтатинг!» каби шиорлар ёзилган плакатларни кўтариб чиққан.
Бош вазир Андрей Бабишнинг ўнг популист ҳукумати жамоат телерадиоэшиттириши учун ундириладиган тўловни бекор қилишни режалаштирмоқда. Унинг ўрнига Чехия телевидениеси — ČT ва Чехия радиоси — ČRo давлат бюджетидан молиялаштирилади.
Ислоҳот молиялаштириш ҳажмини 15 фоиздан кўпроқ қисқартиришни ҳам назарда тутади. dpa агентлигига кўра, намойишчилар бундай ўзгаришлар жамоат ОАВ мустақиллигига путур етказишидан хавотир билдирмоқда.
Қонун лойиҳаси 24 октябр куни эрта тонгда парламент қуйи палатаси — Депутатлар палатасида биринчи ўқишдан ўтган. Энди уни парламент қўмиталари кўриб чиқади.
Чехия президенти Петр Павел ҳукуматнинг ислоҳотни парламентдан шошилинч ўтказишга уринишини танқид қилган. Унинг фикрича, лойиҳани тунги вақтда ва дам олиш кунлари муҳокама қилиш ташаббускорларнинг эзгу ниятига ишончни сусайтиради.
Бабиш эса танқидларни рад этган. «Ҳеч ким дастурлар ёки янгиликларни ёритиш жараёнига аралашмоқчи эмас», — деган бош вазир.
Сўнгги кунларда Прага, Брно ва Чехиянинг бошқа шаҳарларида ҳам шундай норозилик акциялари бўлиб ўтган, бироқ уларда иштирокчилар сони камроқ бўлган.
Ислоҳотни танқид қилаётганлар орасида Европа телерадиоэшиттириш иттифоқи (EBU), Европа журналистлар федерацияси ва «Чегара билмас мухбирлар» ташкилоти ҳам бор. AFP агентлиги қайд этишича, улар Бабишни Словакия бош вазири Роберт Фицо ва Венгриянинг собиқ ҳукумат раҳбари Виктор Орбан йўлидан бориб, жамоат ОАВ мустақиллигини чеклашга интилишда айбламоқда.
