Neo1 JD Industrial компанияси билан ҳамкорликда Хитойнинг CIIF 2026 халқаро саноат кўргазмасида намойиш этилган. Унда юқори куч ва ҳаракат аниқлигини таъминлаш учун гидравлик механизмлар электр юритмалар билан бирлаштирилган.
Робот 41 та фаол эркинлик даражасига эга — бу унинг турли йўналишларда мураккаб ҳаракатларни бажариш имкониятини англатади. Бўғимларнинг 39 тасида компания ишлаб чиққан ихчам рақамли гидравлик юритмалар, билак қисмидаги иккита айланувчи бўғимда эса электр юритмалар қўлланган.
Компания маълумотига кўра, ҳар бир гидравлик юритма қарийб бир килограмм оғирликда бўлиб, бир неча тонналик куч ҳосил қила олади. Бу кўрсаткич роботнинг умумий юк кўтариш қувватидан фарқ қилади: икки қўл учун эълон қилинган жами кўрсаткич 500 килограммни ташкил этади.
Ишлаб чиқарувчи Neo1’ни оғир ускуна қисмларини йиғиш, портларда юк ташиш, юқори ҳарорат ва бошқа ноқулай шароитларда ишлатиш имкониятларини кўриб чиқмоқда.
Атом саноати ҳам эҳтимолий қўллаш йўналишларидан бири сифатида келтирилган. Компания радиацияга чидамли гидравлик модуллар роботдан ядро ёқилғиси билан ишлаш ва ускуналарга хизмат кўрсатишда фойдаланиш имконини бериши мумкинлигини билдирган. Бироқ бунинг учун бутун тизимнинг тегишли хавфсизлик талабларига мувофиқлиги тасдиқланиши керак.
Шунингдек, роботни сув остидаги техник ишлар, кончилик, конструкцияларни қисмларга ажратиш ва вайроналарни тозалашга мослаштириш имкониятлари ҳам тилга олинган.
Ҳозирча булар режалаштирилаётган қўлланиш соҳаларидир. Neo1’нинг ҳақиқий саноат шароитида узоқ муддат ишлаши, чидамлилиги ва самарадорлиги қўшимча синовларда тасдиқланиши лозим.
