Тадқиқотда инглиз тилини ўрганаётган 67 нафар япон иштирок этган. Дастлаб олимлар уларнинг нутққа алоқадор бўлмаган товушлардаги баландлик, давомийлик ва бошқа нозик фарқларни қанчалик яхши сезишини текширган.
Кейин иштирокчиларга инглиз тилидаги cat ва cup сўзларида учрайдиган /æ/ ҳамда /ʌ/ унлиларини фарқлаш вазифаси берилган. Япон тилида бу товушларнинг тўғридан тўғри муқобили йўқ. Топшириқ бажарилаётганда функционал магнит-резонанс томографияси ёрдамида мия фаоллиги кузатилган.
Натижаларга кўра, эшитиш аниқлиги юқори бўлган иштирокчилар хорижий товушларни тинглаганда миянинг нутқни қайта ишлашда иштирок этувчи чап сенсомотор соҳасини камроқ ишга солган. Уларнинг мия фаоллиги нутққа алоқадор бўлмаган товушларни таҳлил қилиш пайтидаги ҳолатга ўхшаган.
Олимларнинг талқинича, бундай одамлар нотаниш товушларни дарҳол она тилидаги таниш товушларга мослаштиришга уринмайди. Улар товушнинг ўз хусусиятларига кўпроқ эътибор беради. Бу эса она тилида шаклланган талаффуз одатларининг таъсирини камайтириши мумкин.
Эшитиш аниқлиги пастроқ иштирокчилар эса нотаниш товушларни фарқлашда она тилининг фонетик қолипларига кўпроқ таянган.
Муаллифлар хорижий тил ўрганишда луғат ва грамматика билан бирга товушлар орасидаги майда фарқларни эшитиш қобилиятини ҳам ривожлантириш фойдали бўлиши мумкинлигини таъкидлаган.
Бироқ тадқиқот асосан хорижий нутқ товушларини фарқлашга бағишланган. У тил ўрганишдаги барча қобилиятлар туғма эканини ёки эшитиш машқлари луғат ва грамматикани ўрганиш ўрнини босишини исботламайди.
