DW хабарига кўра, чекловлар Трамп сентябр охирида имзолаган, «дўзахий санкциялар» номи билан танилган Линдси Грэм қонунида назарда тутилган эди. Қонун уларни 18 октябргача жорий этишни талаб қилган, бироқ миллий манфаатлардан келиб чиқиб, бу жараённи вақтинча тўхтатиш имконини ҳам берган.
Трамп мазкур ваколатдан фойдаланиб, тегишли қарор ҳақида Конгрессга маълум қилган.
Хусусан, Россия товарларига 500 фоизлик қўшимча бож жорий этиш тўхтатиб турилди. Шунингдек, Россия нефти ва газининг энг йирик беш харидори қаторига кирувчи ҳамда Москвага санкцияларни четлаб ўтишда энг фаол ёрдам бераётган давлатлар маҳсулотларига 100 фоизлик бож қўллаш ҳам кечиктирилди.
Фармоннинг амал қилиш муддати аниқ сана билан белгиланмаган. Чекловларни жорий этиш масаласи президент ва давлат котиби молия вазири ҳамда АҚШ савдо вакили билан маслаҳатлашиб, бунга зарурат бор деган хулосага келганида қайта кўриб чиқилади.
Бу қарор Грэм қонуни қабул қилинишидан олдин Россияга нисбатан жорий этилган санкцияларга тааллуқли эмас.
Аввалроқ, 9 октябр куни Трамп Россия дизел ёнилғисини АҚШ ва бошқа бозорларга етказиб бериш бўйича келишувга эришилганини эълон қилган эди. Уни амалга ошириш учун АҚШ Молия вазирлиги санкциялар туфайли тақиқланган айрим операцияларга 2027 йил 7 апрелгача рухсат берувчи лицензия чиқарган. Россия эса дизел экспортига қўйилган чекловларни муддатидан олдин бекор қилишини билдирган.
Axios манбаларининг айтишича, дизел келишуви Украина президенти Володимир Зеленский Трампнинг Россия нефтни қайта ишлаш заводларига зарбаларни тўхтатиш ҳақидаги бир неча илтимосини бажармаганидан кейин тузилган. Зеленский бундай ҳужумларни Россиянинг Украина энергетика объектларига зарбалари тўхтатилиши эвазига бас қилишни таклиф этган.
Украина президенти дизел келишувини «урушга инвестиция» деб атаб, Вашингтонни ўт очишни тўхтатишга эришиш учун Москвага босимни кучайтиришга чақирган.
