DW хабарига кўра, Трамп 16 октябр куни Оқ уй олдида журналистлар билан суҳбатда бу масалага муносабат билдирган.
«Буни кимдир қилганми, билмайман. Бу мен эмас эдим», — деган АҚШ президенти. У чекловлар ҳақида эрталабки янгиликлардан хабар топганини, ўзи билган маълумотларга кўра эса тизим аввалгидек ишлаётганини айтган.
Илон Маск 14 октябр куни Украинанинг собиқ мудофаа вазири Михаил Федоровнинг X ижтимоий тармоғидаги постига жавобан, Starshield ишини чеклашга оид қарорларни АҚШ ҳарбийлари, якуний ҳисобда эса президент қабул қилишини билдирган. Федоров унга тизим фаолияти босқичма-босқич тикланаётгани учун миннатдорлик билдирган эди.
The Telegraph газетаси 16 октябрда тўрт манбага таяниб, Украинада Starshield имкониятларини чеклаш ғоясини Трампга Маск таклиф қилганини ёзди. Манбалардан бирининг даъвосига кўра, президент таклифни маъқуллаган ва шундан кейин Пентагон чекловларни киритган.
Газета маълумотига кўра, тизимдан ҳаракатда фойдаланиш учун тезлик чегараси тахминан соатига 160 километрни ташкил этмоқда. Бу интернетнинг маълумот узатиш тезлиги эмас, терминал ўрнатилган қурилманинг ҳаракат тезлигига оид чекловдир. Нашр бундай чегара тез учувчи Россия реактив дронлари ва ракеталарини тутиб қолишда қўлланадиган аппаратлар имкониятини жиддий чеклашини қайд этган.
Бироқ қарор ким томонидан қабул қилингани ҳақидаги хабарлар турлича. Reuters манбалари кўрсатма Оқ уйдан келганини айтган бўлса, AFP суҳбатлашган америкалик мансабдор Трамп бундай буйруқ бермаганини билдирган.
Украина Мудофаа вазирлиги маълумотига кўра, Starshield ишидаги чекловлар 14 октябрга ўтар кечаси пайдо бўлиб, учувчисиз тизимлар фаолияти ва логистикани қийинлаштирган. 15 октябрда эса вазирлик дала шароитида терминаллар иши тикланганини хабар қилган.
DW билан исмини ошкор қилмаслик шартида суҳбатлашган юқори мартабали украиналик мансабдор Киев чекловлар бўйича АҚШдан изоҳ олмаганини айтган. Унинг сўзларига кўра, Украина бу ҳолатни кейинчалик яна чекловлар жорий этилиши мумкинлиги ҳақидаги сигнал сифатида баҳоламоқда.
