DW хабарига кўра, Франция президенти Эммануэл Макрон 18 октябр кечқурун аҳолига мурожаатида талончилик, вайронкорлик ва полиция ходимларига нисбатан зўравонликни қоралаган.
«Нега французлар Францияга бундай қилмоқда?» — деган президент тартибсизлик иштирокчиларининг ҳаракатларига муносабат билдириб. У вайронкорлик ва талончилик қилганлар етказилган зарарни қоплаши кераклигини айтган.
Шу билан бирга, Макрон намойишчилар кўтараётган муаммолар — турмуш харажатларининг ортиши, реал иш ҳақининг пасайиши ва таълим тизимидаги ҳолатга ҳам тўхталган. У ҳукумат яқин вақтда аҳоли билан мулоқот қилиб, ечимлар устида ишлашини ваъда қилган.
«Ҳеч нарса бу зўравонликни оқламайди», — дея таъкидлаган Франция раҳбари.
17 октябрдаги акциялар давомида Парижда автомобиллар ва ўнлаб дўконларга зарар етказилган. Марселда тартибсизлик иштирокчилари мэрия биносига бостириб кирган, Лионда эса шаҳар туристик офиси биносига ўт қўйилган.
Норозилик ҳаракати ўқув йили бошида мактаб ўқувчиларининг чиқишларидан бошланган эди. Улар таълим тизимини молиялаштиришни кўпайтириш ва олийгоҳларга кириш синовларини ислоҳ қилишни талаб қилган.
Кейинчалик уларга талабалар, касаба уюшмалари, фермерлар ва «сариқ нимчалилар» ҳаракати иштирокчилари қўшилган. Талаблар доираси ҳам кенгайиб, Франциядаги бюджет инқирози фонида турмуш қимматлашишига қарши норозилик асосий масалалардан бирига айланган.
