Морган нефтни қайта ишлаш заводида ишлайди, бўш вақтида эса балиқ овлаш билан шуғулланади. Унинг дрони денгиз юзасига кўтарилиб, озуқа тутаётган финвални яқиндан кузатиш имконини берган.
Финваллар озиқланиш пайтида томоғидаги чўзилувчан тери бурмаларидан фойдаланади. Бу уларга майда қисқичбақасимонлар — крил билан бирга улкан ҳажмдаги сувни оғзига олиш имконини беради. Бир марта оғиз очишда бу ҳажм тахминан 68 минг литрга етиши мумкин.
Ушбу китларнинг узунлиги 23,8 метрдан ошиши, вазни эса 70 тоннага етиши мумкин. Шу боис ҳатто денгиз юзасидаги қисқа ҳаракат ҳам дрон кадрларида ҳайвоннинг улканлигини намоён қилади.
Бангор университетида йирик денгиз йиртқичлари экологиясидан дарс берувчи доктор Марианна Кьимьенти финвалнинг сув юзасига чиқиб озиқланиши одатий ҳолат эканини тушунтирган.
«Финвал учун сув юзасига кўтарилиб, ўша ерда озиқланиш мутлақо табиий — бу унинг озуқа топиш стратегиясининг бир қисми. Аммо уни қирғоққа яқин сувларда кўриш чиндан ҳам ҳайратланарли», — деган тадқиқотчи.
Унинг айтишича, назарий жиҳатдан бу вақтга келиб китлар бошқа ҳудудларга кўчиб кетган бўлиши керак эди. Бироқ финвалларнинг миграцияси ва ҳаёт тарзига оид кўплаб жиҳатлар ҳали етарлича ўрганилмаган. Улар салқинроқ сувларни афзал кўриши тахмин қилинади.
