Янги робот компаниянинг мавжуд H2 платформаси асосида яратилган. Unitree эълон қилган қисқа видеода унинг жисмоний имкониятлари ҳамда одамларни ҳимоя қилишга қаратилган саҳналаштирилган вазиятлар кўрсатилган.
Ролик бошида робот металл чиқиндилари майдончасидаги автомобил томига чиқиб, орқага салто қилади. Кейин тиззаси, тирсаги ва муштлари билан машинага зарба беради. Натижада эшиклар ва капотда сезиларли эзилишлар пайдо бўлади.
Шундан сўнг H2-X баландлиги тўрт метр деб кўрсатилган платформадан сакрайди, ерга тушгач, думалаб, яна оёққа туради. Кейинги кадрларда у сакраб тепиш ва салто каби ҳаракатларни бажаради.
Unitree’нинг таъкидлашича, видеода ҳақиқий синовлар акс этган ва тасвир тезлиги оширилмаган.
Роликнинг бошқа қисмида қўриқлаш ва қутқарувга оид саҳналаштирилган ҳолатлар намойиш этилган. Бир эпизодда робот аёл билан қуролланган киши ўртасига туриб, уни чекинишга мажбур қилади. Бошқасида яқинлашиб келаётган автомобиль йўлида турган одамни итариб, четга олиб чиқади.
Яна бир саҳнада эса робот машина остидаги манекенни чиқариш учун автомобилнинг олд қисмини бироз кўтаради. Демак, видеода бутун автомобилни ердан узиб кўтариш эмас, унинг бир қисмини кўтариш кўрсатилган.
H2-X’нинг батафсил техник хусусиятлари ҳозирча тўлиқ очиқланмаган. Компания тўлиқ қувватланган аккумулятор тахминан саккиз соат ишлашга етишини билдирмоқда. Бироқ бу кўрсаткич қайси юклама шароитида олингани аниқ эмас. Узоқ юриш ва шиддатли сакрашлар автоном ишлаш вақтини қисқартириши мумкин.
Таққослаш учун, оддий H2 модели сиғими 15 ампер-соат бўлган тез алмаштириладиган битта аккумулятор билан тахминан уч соат ишлайди. Янги роботда қандай батарея ёки энергия тежаш ечими қўллангани ҳақида тўлиқ маълумот берилмаган.
Эълон қилинган маълумотларга кўра, H2-X’нинг бўйи қарийб 182 сантиметр, вазни эса 70 килограмм бўлиб, бу жиҳатдан у базавий H2 моделига мос келади.
Робот 31 та эркинлик даражасига эга. Бу унинг бўғимлари турли йўналишларда мустақил ҳаракатлана олишини англатади. Ҳар бир оёққа олтитадан, ҳар бир қўлга еттитадан, бел қисмига учта ва бош қисмига иккита эркинлик даражаси тўғри келади.
Ишлаш ҳарорати диапазони минус 20 даражадан плюс 60 даражагача деб кўрсатилган. Каркасда авиация алюминийси, титан қотишмаси ва юқори мустаҳкамликдаги полимерлар ишлатилган.
