Эронда Ислом инқилоби қўриқчилари корпуси (ИИҚК) Аэрокосмик кучларининг ерости янги ракета шаҳарчаси очилди, деб хабар берди Tasnim агентлиги.
Ракета мажмуаси Қуролли кучлар Бош штаби бошлиғи Али Абдуллоҳий ҳамда ИИҚК Аэрокосмик кучлари қўмондони Саид Мажид Мусавийга тақдим этилди.
Хабар қилинишича, ер остида турли баллистик ва қанотли ракеталар, шунингдек, уларни учириш қурилмалари жойлаштирилган.
Эрон парламенти спикери Муҳаммад Боқир Ғолибоф янги ракета шаҳарчаси Эрон томонидан душманларга йўлланган очиқ-ойдин сигнал эканини таъкидлади.
«ИИҚК Аэрокосмик кучларининг янги ракета шаҳарчаси очилиши Эрон халқининг мамлакат мустақиллиги, хавфсизлиги ва ҳудудий яхлитлигини ҳимоя қилишдаги қатъиятини намоён этади. Бугун намойиш этилган ютуқлар ортида олимлар ва муҳандисларнинг кўп йиллик меҳнати, қўмондонларнинг донишмандлиги ҳамда энг оғир шароитларда ҳам таслим бўлмай, ушбу улкан ва муҳим лойиҳани охирига етказган жангчиларнинг кечаю кундуз олиб борган кураши турибди», — деди парламент раиси.
