Харкив шаҳридаги «Профессионал» номли хусусий мактаб асосчиларидан бири, Россияда ҳибсга олинган Александра Казаровицкая (Колесникова) вафот этган.
44 ёшли Александра Россияда ҳибсдалик чоғида ҳалок бўлгани ҳақида ноябр ойи бошида дўстлари ва ҳамкасблари ижтимоий тармоқларда хабар берганди. «Новая газета Европа» эса бу хабарларда ноаниқлик борлигини қайд этган. Масалан, хабарларда ўқитувчи Севастополдаги тергов изоляторида вафот этгани тахмин қилинганди. Аммо Александра Қримгача етиб бормаган.
«Новая газета Европа» Александранинг дўстлари билан гаплашиб, унинг тарихини ҳикоя қилди. Ушбу ўқитувчи аёл – СССР парчалангач, Россия армиясига хизматга кирган ҳарбийнинг қизидир. Унинг ота-онаси РФ фуқаролигини олган ва Севастополда яшаган. Мактабни тамомлаганидан кейин Александра ўқиш учун Харкивга кетган ва ҳозиргача ўша ерда яшаб ва ишлаб келган (дастлабки хабарларда у сўнгги вақтларда Туркияда яшагани айтилганди).
Ўқитувчининг дўстлари у ватанпарвар бўлгани ва тилни мустақил ўрганиб, украин адабиётига қизиқиб қолганини айтишади. Яқинларига кўра, Александра бир неча жойда ишлаган, дарс берган ва ўзи ҳам доим нимадир ўрганишга ҳаракат қилган. Қрим аннексия қилинганидан кейин Александра яриморолга бормай қўйган. У Қримда қолишга қарор қилган ота-онаси билан гоҳ Туркияда, гоҳ Гуржистонда учрашиб турган.
Александранинг ўлими ҳақида биринчилардан бўлиб унинг дугонаси Ирина Салник хабар қилди. У ўз хабарида аниқлик киритишича, Александра Қримга бошқа хабарларда айтилганидек, ота-онасига уйни сотишда ёрдам беришга эмас, ҳужжатларини янгилаш учун йўл олганди. Дугонасининг сўзларига кўра, телефонида катта уруш бошида ёзишиб турган украиналик кўнгилли билан чати туфайли Александрани қўлга олишган. Кейин уни уч ой мобайнида бир кишилик камерада ушлаб туришган, ўша ерда вафот этганидан кейин эса Севастополда дафн этишган.
Александра Россия ҳудудига қандай кириб келгани, уни қаерда қўлга олишгани ва у қайси тергов изоляторида сақлангани номаълум. «Новая газета Европа» аниқлашича, Казаровицкая Владикавказда ҳалок бўлган. Шундан кейин унинг жасади Севастополга ота-онаси олдига олиб борилган ва 3 ноябр куни ўша ерда дафн этилган.
Россия томонининг расмий версиясига кўра, Александра 24 октябр куни ўз жонига қасд қилган. Аммо унинг оила аъзолари ва дўстлари бунга ишонмаяпти, улар Казаровицкаянинг дини ўз жонига қасд қилишни тақиқлашини қайд этишмоқда: у буддизмга эътиқод қилган. Александранинг дафн маросимида Севастополдаги буддизм маркази вакиллари ҳам қатнашган. Александранинг дугоналаридан бири Анна Зеленская-Сумкина айнан улардан аёлни тергов изоляторида эмас, хусусий уйда «осилган ҳолатда» топишгани ҳақида маълумот олган – бу уй қамоғига ўхшаш ҳолат эди. Ўқитувчининг дўстлари унинг ўлими ҳақида хабар чиққанидан буён Александрани «Россия ўлдиргани»ни таъкидлаб келмоқда.
