O‘zbekistonda 2020 yilgacha avtomobillarga gaz to‘ldirish kompressor stansiyalari soni 800tadan oshadi

22 avgust kuni O‘zbekiston Milliy matbuot markazida «O‘ztransgaz» aksiyadorlik kompaniyasida amalga oshirilgan islohotlar va erishilgan natijalarga bag‘ishlangan matbuot anjumani o‘tkazildi. Bu haqda O‘zA xabar bergan.

«O‘ztransgaz» aksiyadorlik kompaniyasi boshqaruvi raisining o‘rinbosari M.Boshmanov va boshqa rahbarlar ishtirokida kechgan anjuman davomida O‘zbekistonda avtomobillarga gaz to‘ldirishga mo‘ljallangan 475 kompressor stansiyasi faoliyat ko‘rsatayotgani hamda 2020 yilga borib ularning sonini 809taga yetkazish rejalashtirilgani ta'kidlandi.

Davlat rahbarining 2012 yil 21 dekabrdagi «O‘zbekiston Respublikasining 2013 yilgi investitsiya dasturi to‘g‘risida»gi qaroriga muvofiq, kompaniya tomonidan tabiiy gaz iste'molini hisobga olish va nazorat qilishning avtomatlashtirilgan tizimini amaliyotga joriy etishga kirishildi. Loyiha dastlab poytaxtimizning Yunusobod va Toshkent viloyatining Qibray tumanlarida amalga oshirilishi ko‘zda tutilgan bo‘lib, iste'molchilarga 108 ming 615 dona hisoblagich o‘rnatiladi. 

2015 yilning iyun oyidan gaz ta'minoti va iste'moli bo‘yicha ma'lumotlarni onlayn rejimda olish imkoniyatini taqdim etadigan veb-portal ishga tushirildi. Hozirgi paytgacha tizimdan 500 ming foydalanuvchi ro‘yxatdan o‘tib, o‘z shaxsiy kabinetini ochgan. Aholiga gaz berilishini nazorat qilish hamda hisob-kitoblarni yurituvchi «L Gas», «Fossa» dasturlari ishlab chiqilib, amaliyotga joriy qilingan.