AQShda kimyoviy zavodda xlor tashqariga oqib ketdi

AQShning G‘arbiy Virjiniya shtatidagi kimyoviy korxonada suyuq xlor tashqariga oqib ketdi. Voqea oqibatida 2 kishi jarohat oldi. Bu haqda TASS axborot agentligi xabar bermoqda.

Ta'kidlanishicha, voqea Proktor shahri yaqinidagi Marshal okrugida yuz bergan. Bir necha aholi punkti evakuatsiya qilinishi e'lon qilingan. Shuningdek, yaqin atrofdagi yo‘llar yopilgan.

"Marshal okrugidagi Axiall kimyoviy korxonasida vagon sisternadan suyuq xlor oqib ketgan", deyilmoqda xabarda.

Kimyoviy moddaning chiqib ketishi oqibatida zavod ustida zaharli bulut hosil bo‘lgan va u janubga tomon yo‘nalmoqda.

Voqea oqibatida 2 ishchi jarohat olgan, ular shifoxonalarga yetkazilganlar.