Filippin qamoqxonasiga hujum uyushtirildi

27 avgust kuni islom jangarilarining Filippin janubidagi qamoqxonaga uyushtirgan hujumi natijasida 23 nafar mahbus qochishga ulgurgan. Bu haqida qamoqxona nazoratchisi Akmad Tabao ma'lum qildi.

“Dastlab politsiya 28 nafar mahbusning qochganligi haqida xabar qilgandi, ammo Tabao bu raqamga aniqlik kiritdi”, - deb yozadi Singapurning yetakchi nashri bo‘lgan Straits Times.

Bundan avval “Maute” filippin guruhining taxminan 50 nafar qurollangan jangchisi Maravi shahridagi qamoqxona hududiga bostirib kirishgan va bir hafta ilgari qo‘lga olingan 8 nafar sheriklarini ozod qilishgan.

Manbaga ko‘ra, xavfli jinoyatchilar qamoqxonasida saqlanuvchi yana 15 nafar mahbus bu fursatdan foydalanib, qochib qolgan.

Bu filippin qamoqxonalarida tashkillashtirilgan birinchi ommaviy qochish emas. 2009 yilda yuzdan ortiq qurollangan jangarilar Basilan orolining janubidagi qamoqxonaga hujum uyushtirishgan va 31 nafar mahbusni ozod qilishgan.