Germaniyalik tennischi Angelika Kerber AQSh Ochiq chempionati finalida chexiyalik Karolina Plishkovani mag‘lub etib, turnirdagi ilk chempionligini nishonladi.
Nyu-Yorkda bo‘lib o‘tgan final bahsida turnirga ikkinchi raketka sifatida tasniflangan Kerber Plishkovani (10-raketka sifatida saralangan) 2 soatu 7 daqiqa davom etgan 3 setlik bahsda 6:3, 4:6, 6:4 hisoblarida mag‘lub etdi.
Yarim final bahsida Plishkova jahonning birinchi raqamli ayol tennischisi, amerikalik Serena Uilyamsni yenggandi. US Open-2016 yakunlariga ko‘ra Uilyams WTA reytingida birinchi o‘rindan tushib ketdi, yangi yetakchi esa Kerber bo‘ldi.
U yarim finalda daniyalik Karolina Voznyatskini 6:4 va 6:3 hisoblarida yengib, finalga yo‘l olgandi.
Joriy mavsumda 28 yoshli bu tennischi "Katta dubulg‘a" turkumidagi ikkinchi g‘alabasiga erishdi. U qishda Avstraliya ochiq chempionatida ham g‘olib bo‘lgandi.