Ijtimoiy tarmoqlarda bir-biri bilan kesishuvchi chiziqlar va bir vaqtning o‘zida ko‘rishning ilojisi bo‘lmagan qora nuqtalar tasvirlangan optik illyuziya keng tarqalmoqda.
O‘yin dasturlovchisi Uill Kersleyk 12 sentabr kuni o‘zining tvitterida ushbu tasvirni joylashtirdi va u bir kecha-kunduzda 13 ming retvitga ega bo‘ldi. Undan bir kun avval esa yaponiyalik professor Kitaoka feysbukda mazkur suratni joylagan bo‘lib, u ham 7 mingdan ko‘p marta bo‘lishilgan. Bu tasvirning original varianti 2000 yilda Perception jurnalidagi ilmiy maqolada chop etilgan.
Illyuziyaning mohiyati shundan iboratki, insonning ko‘zi aksariyat hollarda chiziqlar kesishgan joydagi belgilangan 12 nuqtani bir vaqtning o‘zida ilg‘ay olmaydi.
Bu periferik ko‘rish xususiyatlari bilan bog‘liq: miya tasvirni u haqidagi taassurotlardan kelib chiqib to‘ldiradi, mazkur holatda esa u insonga diqqat jamlangan nuqtaning atrofidagi kulrang chiziqlardan iborat andozani "ko‘rish"ga imkon beradi
Tasvir 1870 yilda nemis fiziologi Lyudimar German tomonidan aniqlangan optik illyuziya - "German to‘ri"ning variatsiyasi hisoblanadi. Original to‘rga diqqat bilan qaralganda oq chiziqlarning kesishgan joyida yolg‘on qora sohalar paydo bo‘lardi.
Ijtimoiy tarmoq foydalanuvchilari ushbu illyuzion tasvirni 2015 yilning eng mashhur memlaridan biri - ba'zilarga oq, boshqalarga esa ko‘k rangda ko‘rinuvchi ko‘ylakka qiyoslashdi.
