Yangi banknotalar. 200 va 2000 rubllik banknotalar dizaynida qaysi shaharlar tasviri paydo bo‘lishi aniqlab olindi

200 va 2000 rubllik yangi qog‘oz pullarda Sevastopol va Uzoq Sharqni bildiruvchi tasvirlar aks ettiriladigan bo‘ldi. Bu "Rossiya-1" telekanalida o‘tkazilgan yakuniy sms-ovoz berish yordamida aniqlab olindi. Avval o‘tkazilgan onlayn-ovoz berishda Sevastopol va Qozon yetakchilik qilayotgandi.

Onlayn-ovoz berish yakunlangandan keyin rossiyaliklarda "Rossiya-1" telekanali orqali jonli tarzda o‘tkazilgan sms-ovoz berish bilan ovoz berish natijalariga ta'sir qilish uchun oxirgi imkoniyat qolayotgan edi. Ovoz berish 7 oktabrda Moskva vaqti bilan soat 19:00da boshlanib, 20:00 da yakunlandi.

Shu bir soat ichida Vladivostok 3-o‘rindan 1-o‘ringa ko‘tarilib, yetakchilar orasidan Qozonni chiqarib yuborishga muvaffaq bo‘ldi.

Qog‘oz pullarda Sevastopol cho‘kib ketgan kemalarga bag‘ishlangan yodgorlik va Xersones Tavricheskiy, Uzoq Sharq esa "Vostochniy" kosmodromi va Russkiy oroliga o‘tkazilgan ko‘prik orqali taqdim qilinadi.

Rossiya Markaziy banki rahbari Elvira Nabiullina bu joylardan qaysi biri qaysi kupyurada paydo bo‘lishi hozircha noaniqligini aytdi, biroq Vladivostok rossiyaliklarda "Mumiy Troll" guruhining "Vladivostok 2000" ashulasi sababli 2000 raqami bilan esga olinishini aytdi.

Markaziy bank yangi qog‘oz pullarni 2017 yilda chiqara boshlaydi. Qog‘oz pullarning yakuniy dizaynini 2017 yil apreligacha ishlab chiqishga va'da berilmoqda.

Sevastopol. Cho‘kib ketgan kemalarga bag‘ishlangan yodgorlik.

Sevastopol. Xersones Tavricheskiy

Vladivostok. "Vostochniy" kosmodromi

Vladivostok. Russkiy oroliga ko‘prik

Suratlar:journal.ru