Avval xabar berganimizdek, shu yilning 1 oktabridan Paris Expo Porte de Versailles hashamatli ko‘rgazmalar markazida Parij xalqaro avtosalon o‘z ishini boshladi. U, dunyodagi eng ko‘p tomoshabin tashrif buyuruvchi avtoko‘rgazma hisoblanadi.
123 ming kvadrat metrlik maydonda jahonning PSA, Renault, Audi, BMW, Mercedes-Benz, Hyundai, Porsche, Land Rover, Volkswagen, Skoda, Isuzu Motors kabi kompaniyalari o‘zlarining yangi mahsulotlarini tomoshabinlar e'tiboriga havola etgan.
Mutaxassislarning fikricha, bu yilgi Parij avtosalonining o‘ziga xos jihati elektromobillarning ko‘pligida bo‘lgan. Taxminlarga ko‘ra, bu yilgi avtosalonga 1 milliondan ortiq inson tashrif buyurishi kutilayapti.
Ta'kidlash kerakki, O‘zbekiston Respublikasi ham avtomobil ishlab chiqarish sanoatini rivojlantirayotgan dunyoning 28 davlati orasida o‘z o‘rniga ega. Bugungi kunda, mamlakat avtosanoati mahsulotlari jahonning 15dan ortiq davlatiga eksport qilinmoqda.
Dunyodagi ayrim yetakchi avtomobil ishlab chiqaruvchi kompaniyalarning «Jahon» axborot agentligiga bergan intervyusida O‘zbekistonda bu sohaning rivojlanish sur'atlariga yuqori baho bergan.
Xususan, Isuzu Motors kompaniyasining Yevropa mamlakatlari bo‘ylab vakilligi rahbari Toru Makinushi, Parij avtosalonida ishtirok etayotgan o‘zbekistonliklarni olqishlagan va O‘zbekiston ahlini Respublika mustaqilligining 25-yilligi bilan qutlagan.
Uning so‘zlariga ko‘ra, bu yil Isuzu Motors kompaniyasi ham o‘zining yubiley sanasini nishonlamoqda. 2016 yilda kompaniya asos solinganiga 100 yil bo‘ladi. Makinushi O‘zbekiston bilan hamkorlik qilishning ajoyib tajribaga ega ekanini qayd etar ekan, o‘zbek iste'molchilarining Isuzu Motors kompaniyasi mahsulotlarini tanlayotganiga tashakkur bildirgan.
O‘z navbatida Opel avtokonsernining Yevropa mamlakatlarida kommunikatsiyalar bo‘yicha direktori Jo-Filipp Kempe Parij avtosalonida ishtirok etayotgan o‘zbekistonliklarni olqishlab, garchi respublika avtomobil ishlab chiqaruvchi mamlakatlar safiga qo‘shilganiga unchalik ham ko‘p bo‘lmaganiga qaramay, bu sohada katta muvaffaqiyatlar qozonganini ta'kidlagan.
Suratlar: 1news.uz
