Afina markazida bomba portladi

Gretsiya poytaxti Afina shahri markazida bomba portlatilgan. 12 oktabr kuni kechqurun sodir bo‘lgan hodisada hech kim jabrlanmagan, deb xabar qilmoqda "Naftemporiki" internet nashri.

Qayd etilishicha, portlash mahalliy vaqt bilan tungi 22:45lar atrofida Ekzarxia tumani Ippokratos ko‘chasida yuz bergan. 

Nashrning yozishicha, soat 22:20larda noma'lum kimsa "Muharrirlar gazetasi" idorasiga qo‘ng‘iroq qilib, Ippokratos ko‘chasidagi kitob do‘koniga portlovchi moslama o‘rnatgani va u yarim soatdan so‘ng ishga tushishidan ogohlantirgan. 

Pronews.gr nashriga ko‘ra, bomba "Elefteri skepsi" ("Erkin fikr") do‘konini vayron qilgan. 

OAV qayd etishicha, portlash juda kuchli bo‘lgan. Tahlilchilarning aytishicha, portlashning bu shaklda amalga oshirilishi hududdagi anarxiyachilarning jinoyatda qo‘li borligini ko‘rsatadi. Odatda ular yarim bir soat oldin gazeta nashrlarini portlashdan ogohlantirishadi. Surishtiruv ishlari olib borilayapti.