Tailand qiroli qoshidagi maxfiy kengash rahbari Prem Tinsulanon qirol Pumpion Adulyadetning vafotidan keyin valiahd shahzoda 64 yoshli Maxa Vachiralongkorn taxtga chiqquniga qadar vaqtinchalik regent vazifasini bajarib turadi. Bu haqda Bangkok Post xabar bergan.
"Konstitutsiyaga ko‘ra general Prem Tinsulanon regent etib tayinlandi. Valiahd shahzoda taxtga chiqishni kechiktiradigan holatlarda Maxfiy kengash raisi o‘z-o‘zidan regentga aylanadi", deyilgan nashrda.
96 yoshli Prem Tinsulanon 1998 yildan buyon Tailand qiroli qoshidagi maxfiy kengashga rahbarlik qilib keladi. U Tailand ichki siyosatidagi muhim shaxslardan biridir. 1980 yildan 1988 yilgacha general Tinsulanon mamlakat bosh vaziri bo‘lgan.
Bundan oldinroq, mamlakatning hozirgi bosh vaziri Prayut Chan-Ocha shahzoda taxtga chiqish marosimini o‘tkazishga shoshilmay, «millat bilan birgalikda qayg‘uga cho‘mish» imkonini berishni so‘ragani haqida aytgandi.
Eslatib o‘tamiz, qirol Pxumipon Adulyadet 88 yoshida olamdan o‘tdi. Shu munosabat bilan mamlakatda bir yillik motam e'lon qilindi.
Marhum 1972 yilda o‘zining valiahdi etib shahzoda Maxa Vachiralongkornni tayinlagan edi. Mamlakat qonunchiligiga muvofiq, qirolning o‘limidan so‘ng parlamentning favqulodda yig‘ilishi o‘tkazilib, uning yakunlariga ko‘ra valiahd taxtga chorlanishi lozim edi. Ammo parlament majlisidan so‘ng Maxa Vachiralongkorn taxtga chorlanmadi.
Endilikda voris nomi parlamentning maxsus yig‘ilishida oshkor etiladigan bo‘ldi. Bu voris Maxa Vachiralongkorn bo‘lishi kutilmoqda.
Vorislik navbatida ikkinchi o‘rin malika Maxa Chakri Siridonga tegishli hisoblanadi.
