Narendra Modi: Ikki yangi do‘stdan bir qadrdon yaxshi

Hindistonning Goa shtatida Rossiya davlat rahbari Vladimir Putin va Hindiston bosh vaziri Narendra Modi o‘rtasida muzokaralar bo‘lib o‘tdi. Shundan so‘ng, davlat va hukumat rahbarlari OAV uchun matbuot anjumani o‘tkazishdi. 

Narendra Modi o‘z bayonotini "ikki yangi do‘stdan eski qadrdon yaxshi", degan rus maqoli bilan boshlagan.

"Hindiston va Rossiya o‘rtasidagi muzokaralar, bizning aloqalarimizga aniq yo‘nalish,  yanada kuchliroq turtki beradi", - degan hind hukumati rahbari. U, o‘zaro muloqotni keng qamrovli va foydali bo‘lganini qayd etgan. 

Modi bu safargi uchrashuvda erishilgan kelishuvlar orasida, 200ta Ka-226T vertolyotlarini birgalikda ishlab chiqarish bo‘yicha kelishuvni hamda neftgaz sohasidagi aloqalarning rivojlanishini alohida e'tirof etgan. 

Bosh vazirning aytishicha, tomonlar iqtisodiy aloqalarni kengaytirish, rivojlantirish va chuqurlashtirishni davom ettiradi. 

Modi shuningdek, rasmiy Moskva Hindistonning xalqaro terrorizmga qarshi kurashini qo‘llab-quvvatlayotganini bildirgan. 

Vladimir Putin va Narendra Modi o‘rtasidagi muzokaralar yakunida jami 18ta hujjat imzolangan hamda global tinchlik va barqarorlikka erishishga oid yondashuvlar bo‘yicha qo‘shma bayonot qabul qilingan.