Зилзила маркази Норча коммунасидан атиги 6 километрда жойлашган ва айнан шу ҳудуд бошқа ерларга нисбатан кўпроқ зиён кўрган. Муқаддас Бенедикт номидаги машҳур ибодатхона ва яна бир қадимий ибодатхона буткул вайрон бўлган. Шуниси қизиқки, шаҳардаги бошқа биноларга зиён етмаган. Ижтимоий тармоқларда бинонинг зилзиладан аввалги ва кейинги суратлари тезлик билан тарқала бошлади.
Манбага кўра, ер силкинишидан олдин ибодатхонада одамлар бўлган, бироқ уларнинг орасида ҳалок бўлганлар йўқ.
Янги зилзилалар ўтган ҳафта табиий офатдан жабр кўрган Аркуата-дель-Тронтони деярли ер билан яксон қилган.
Рим ва бошқа йирик шаҳарларда ҳам кучли ер тебранишлари сезилган. Пойтахтда метро хизмати тўхтатиб қўйилган.
26 октябрда Италияда икки соат фарқ билан 5,5 ва 6,1 магнитудали зилзилалар содир бўлди.
Август охирида эса кучли ер силкиниши натижасида мамлакатда 300 нафардан ортиқ киши ҳалок бўлганди. Ўшанда ҳаммадан кўп Аматриче шаҳри жабр кўрган.
Суратлар:tjournal.ru
