Surunkali kasalliklarni davolash uchun sun'iy asab ishlab chiqildi

Lincheping universitetidagi tadqiqotchilar guruhi og‘riqni kamaytiruvchi yangi ixtiro - sun'iy asabni namoyish qilishdi. Bu haqida Science Advances jurnali ma'lum qildi. 

Yangi texnologiya oz miqdordagi gamma-aminomoy kislotasi (GAMK) va turli preparatlarni asab tizimining signallarni uzatuvchi tezligida yetkazib berishga imkon yaratadi. GAMK asab signallarini bloklash va og‘riqni nazorat qilish uchun xizmat qiluvchi biologik jihatdan faol kimyoviy modda hisoblanadi. Olimlar o‘z ixtirolarini ion nasos deb atashdi. 

"Biz insonning asab tizimi bilan muammosiz uyg‘unlashishi mumkin bo‘lgan sun'iy asabni yaratdik, - deydi tadqiqot mualliflaridan biri Magnus Berggren. - Signal 0,1 millisoniyada ikki sinaps o‘rtasidan o‘tadi va biz amalda bu tezlikka erishishga muvaffaq bo‘ldik".

Mazkur tadqiqotga 10 yildan ortiq vaqt sarflandi va endi mualliflar tirik hujayrali texnologiyalarni sinovdan o‘tkazishga tayyorlar. Ion nasosdan surunkali og‘riqlarni davolash yoki epileptik xurujni to‘xtatishda foydalanish mumkin.