OAV: Iroq Kurdistoni Rossiyadan yordam so‘radi

Iroqning Kurdiston muxtor viloyati hukumati xalqaro aloqalar departamenti boshlig‘i Falah Bakir Rossiyaga harbiy va gumanitar yordam so‘rab, murojaat qilgan, deb yozmoqda «Izvestiya» nashri.

Bakir Rossiya TIV rahbari o‘rinbosari Mixail Bogdanov bilan 1 noyabr kuni uchrashgan. Tomonlar muloqot chog‘ida qator masalalar, xususan, Iroq Kurdistoni va Rossiyaning terrorizmga qarshi kurashdagi munosabatlarini muhokama qilishgan. Bundan tashqari, Iroq Kurdistoni vakili harbiy va insonparvarlik yordamlari so‘raganini ma'lum qilgan. 

«Bizning fikrimizcha, jahon hamjamiyati, birinchi galda bizning ittifoqchilarimiz, xususan Rossiya har tomonlama yordam ko‘rsatishi lozim», — deya bayonot bergan Bakir.

Uning so‘zlariga ko‘ra, Rossiya tomoni ikki tomonlama aloqalar rivojlanishi muhimligini e'tirof etgan. Bakirning aytishicha, Moskva murojaatlarni o‘rganib chiqishga va'da bergan.