WSJ: Shell Braziliyaga 10 mlrd dollar sarmoya kiritmoqchi

Niderlandiya-Britaniyaning Royal Dutch Shell kompaniyasi kelasi besh yil mobaynida Braziliya neft konlarini o‘zlashtirishga 10 mlrd dollar sarmoya kiritmoqchi. Bu haqda, The Wall Street Journal nashri kompaniyaning suvosti loyihalari bo‘yicha vitse-prezidenti Vael Savanga tayangan holda yozmoqda. 

«Biz bugungi kunda, yirik xorijiy investormiz. Har yili biz 2 mlrd dollardan sarmoya kiritamiz», — degan Savan.

Ma'lum bo‘lishicha, mazkur kompaniya shu paytga qadar Braziliyadagi loyihalariga 30 mlrd dollar atrofida mablag‘ kiritgan, bundan tashqari mamlakat bo‘ylab 5,5 ming yoqilg‘i quyish shaxobchalarining operatori hisoblanadi. 

Ekspertlarning fikricha, Shell kompaniyasi yaqin yillarda Braziliya hududida kuniga 400 ming barrel neft qazib olishni boshlaydi.