Finaldan oldingi qo‘rqinchli final: Kolumbiyadagi aviahalokat haqida hozirgacha nimalar ma'lum?

Bugun Kolumbiya hududida, Medelin shahri yaqinida bortida 22 nafar futbolchi ham bo‘lgan yo‘lovchi samolyot aviahalokatga uchradi. Samolyot bortida Braziliyaning «Shapekoense» jamoasi futbolchilari ham bo‘lgan. Ular Medelinga Kopa Sudamerikana musobaqasida «Atletiko Nasonal»ga qarshi 1 dekabrda o‘tkazilishi lozim bo‘lgan uchrashuvga uchib ketayotgandi.

20 jamoa ishtirok etadigan Braziliya A seriyasida 37-turdan keyin 9-o‘rinni egallab turgan «Shapekoense» jamoasi Janubiy Amerika mintaqasi klublari o‘rtasidagi Kopa Libertadores turniridan keyin nufuzi jihatdan ikkinchi o‘rinda turadigan Kopa Sudamerikano musobaqasi finaliga chiqqandi.

Bortda jami 81 kishi bo‘lgan: 72 yo‘lovchi (48 kishi klub delegatsiyasi vakillari va 21 nafar jurnalist) va ekipajning 9 nafar a'zosi.

Kolumbiyadagi samolyot halokati hududida olingan suratlar tarqaldi

Omon qolganlar: 5 kishi, jumladan 3 futbolchi, bir massajchi hamda styuardessa omon qolgan. Ular ayni vaqtda shifoxonaga yetkazilgan.

Mahalliy politsiya 75 kishi halok bo‘lganini tasdiqladi.

Dastlab omon qolgan futbolchilar «Shapekoense» himoyachisi Alan Rushel va yarim himoyachi Jyekson Follmann ekani aytildi.

Keyinchalik darvozabon Markos Danilo Padile ham tirik qolgani ma'lum bo‘ldi.

Lamia aviakompaniyasi samolyoti halokatdan oldin favqulodda vaziyat haqida yerdagilarni ogohlantirgan: elektr jihozlar ishdan chiqqandi. Samolyot Medelin shahri yaqinida, aeroportga 50 kilometr masofa qolganida qulagan. Qulashdan oldin portlash ro‘y bermagani ba'zi yo‘lovchilarning omon qolishiga sabab bo‘ldi.

«Shapekoense» aviahalokatga uchragani sababli Janubiy Amerikada xalqaro o‘yinlar bekor qilindi

«Shapekoense» jamoasi o‘rta sig‘imli BAe 146 samolyotida uchgandi. Aynan shu samolyotdan bir oy oldin Argentina terma jamoasi va Lionel Messi foydalangandi.

Halokat vaqtida havo sharoitlari ham yaxshi bo‘lmagan: kuchli shamol va dovul kuzatilgan. Ob-havo sharoiti va halokat tog‘li hududda ro‘y bergani qutqaruvchilarning ishlarini qiyinlashtirgan.

«Shapekoense» Braziliya chempionatida 2014 yildan buyon ishtirok etib kelmoqda. 10 yil oldin jamoa bankrot yoqasiga kelgan, ammo 2009 yilda bir guruh tadbirkorlar tashabbusi bilan jamoa saqlab qolindi. To‘plangan mablag‘ning 30 foizi klub qarzlarini to‘lash uchun sarflandi (taxminan yarim million dollar), 70 foizi klubni qayta qurish uchun yo‘naltirilgan.

O‘sha vaqtda «Shapekoense» D seriyasida ishtirok etardi. Bir yil o‘tiboq jamoa uchinchi divizionga ko‘tarildi, keyingi yilda esa B seriyaga. To‘rtinchi ligadan Kopa Sudamerikana finaligacha yo‘l 7 yilda bosib o‘tilgandi.

«Shapekoense» jamoasi muvaffaqiyati moliyaviy tashkilotchilikning to‘g‘ri yo‘lga qo‘yilgani bilan bog‘liq. Klub xususiy kompaniya tomonidan boshqariladi. «Shapekoense» Braziliya chempionatidagi maoshlar eng yuqori bo‘lgan jamoa edi – oyiga 90 ming brazil reali (26,5 ming dollar).

«Shapekoense»ning 9 futbolchisi jarohat tufayli samolyotga chiqmagandi

O‘tgan yilda «Shapekoense» xalqaro turnirda ilk marta ishtirok etdi va Kopa Sudamerikana turnirining chorak finaliga qadar yetib borib, «River Pleyt»ga yutqazdi (1:3, 2:1). 5 kun oldin jamoa Argentinaning «San-Lorenso» jamoasi to‘sig‘idan o‘tib, turnir finali yo‘llanmasini nishonlagandi.

Kopa Sudamerikana turnirining ikkinchi finali 7 dekabrga belgilangandi. «Shapekoense» ixchamgina stadionga ega (22 ming tomoshabin), shu tufayli o‘yin boshqa shtatga – Kuritibu shtatiga ko‘chirilgandi. Bu yerda 40 ming kishilik arena bor.

Lekin bu o‘yin endi bo‘lmaydi.

Jamoaning aeroportda parvozga chiqish oldidan olingan oxirgi videosi.