Qur'adan keyin. Tanganing ikkinchi tomoni

Yevropa chempionlar ligasining 1/8 final ikkinchi haftada o‘tkaziladigan o‘yinlari birinchi haftasida bo‘lgani kabi unchalik ham jarangdor deb bo‘lmaydi. Har bitta juftlikda nisbatan chorak finalga munosibroq jamoani ko‘rish mumkin. Tribuna.Uz navbatdagi to‘rtta juftlikni tahlil qilib ko‘radi.

Bayyer – Atletiko Madrid (21 fevral, 2017 yil)

Bu jamoalar ham bundan 2 yil muqaddam pley-offning shu bosqichida o‘zaro ro‘baro‘ kelishgandi. Ikkita o‘yinda ham mezbonlar 1:0 hisobida g‘alaba qozongan, Madriddagi uchrashuvda penaltilar seriyasi bo‘lib o‘tgan. Lotereyalar bahsida «Atletiko» ustun kelgandi. Qiziq tomoni ikkala jamoa uchrashgan yillarida doim tenglik kuzatiladi. 2010 yilda bu ikki klub bir guruhdan joy olgan va ikkita o‘yinda ham 1:1 hisobida durang qayd etilgandi.

Bo‘lajak o‘yin
Hozirgi kunga kelib ispan jamoasini favorit sanash mumkin. Biroq so‘nggi ikki yildagi aynan shu bosqichdagi o‘yinlariga qarasak, Simeone shogirdlari osonlik bilan keyingi bosqichga o‘tmaganini ko‘rishimiz mumkin. Avvaliga «Bayyer», o‘tgan yili esa PSV faqatgina penaltilar seriyasida mag‘lub etilgan. Shunday ekan, bizni oldinda juda qiziqarli o‘yin kutib turgani shubhasiz.

(Tribuna.Uz talqiniga ko‘ra) Imkoniyatlar: 45-55

Manchester Siti – Monako (21 fevral, 2017 yil)
Yevropaning joriy mavsumdagi eng kuchli hujum chizig‘iga ega bo‘lib turgan «Monako» himoyada juda ko‘p muammolarga uchrayotgan «Manchester Siti»ga qarshi maydonga chiqadi. Aslida Jardim o‘zining himoyaviy o‘yin uslubi bilan tanilgan. Biroq joriy mavsumda uning jamoasi hujumkor o‘yini bilan ajralib turibdi. Mavsumning yarmiga ham yetmay turib jamoa 53 bor raqiblar darvozasini ishg‘ol qilganining o‘ziyoq ko‘p narsani anglatib turibdi.

Bu ikki jamoa bir-biri uchun mutlaqo yangi klub sanaladi. Shu kunga qadar «Monako» va «Manchester Siti» o‘zaro birorta uchrashuvda ham maydonga chiqmagan.

Bo‘lajak o‘yin
Bir qarashda Xosep Gvardiola jamoasi juftlikda favorit ko‘rinishi mumkin. Biroq so‘nggi paytlarda «Manchester Siti» ko‘rsatayotgan o‘yin aynan «Monako» kabi jamoalar uchun juda qulay usul bo‘lib chiqmoqda. Jardim Fransiya chempionatida hujumkor futbol namoyish etayotgan bo‘lishiga qaramay, «Siti» kabi to‘p bilan total ustunlikda muomalada bo‘lishni yaxshi ko‘radigan jamoalar bilan qarshi hujumda o‘ynashni juda yaxshi ko‘radi. «Arsenal»ga qarshi ikki mavsum oldingi o‘yin bunga yaqqol misol.

Portu – Yuventus (22 fevral, 2017 yil)
O‘tgan yilgi mavsum so‘nggi turida imkoniyatni boy berib, birinchi o‘rindan mahrum bo‘lgan «Yuventus» 1/8 finalda eng yaxshi sport formasida bo‘lgan «Bavariya»ga ro‘baro‘ kelib qolgan va musobaqa bilan xayrlashgandi. Bu safar endi nisbatan kuchsizroq raqib Allegri jamoasi yo‘lida paydo bo‘ladi.

Ikki jamoa so‘nggi marta yangi asr boshida guruh bosqichida o‘zaro ro‘baro‘ kelishgandi. Portugaliyada hisob ochilmagan bo‘lsa, Turinda mezbonlar 3:1 hisobida zafar quchgan. Bungacha esa 1984 yilda Kubok egalari kubogi finalida «Yuventus» 2:1 hisobida g‘alaba qozonib bosh sovringa ega chiqqandi.

Bo‘lajak o‘yin.
So‘zsiz «Yuventus» uchrashuvning favoriti sifatida qaralmoqda. Ammo «Portu» uzoq yillardan buyon kuchli raqiblarga qarshi «chaqilmas yong‘oq» bo‘lishini hisobga olinsa, barchasi boshqacha tus olishi ham mumkin. Shuningdek, Allegri jamoasida so‘nggi paytlarda jarohat olgan futbolchilar juda ham ko‘pchilikni tashkil qilmoqda. Fevralning so‘nggi haftasida jamoa qanday sport formasida yetib keladi, hozircha bu qorong‘u.

Tribuna.Uz talqiniga ko‘ra imkoniyatlar: 40-60

Sevilya – Lester (22 fevral, 2017 yil)

Ko‘pchilikning fikriga ko‘ra, eng zaif juftlik. Aynan mana shu ikki jamoa ishtirokidagi o‘yin, yangragan fikrlarga ko‘ra chorak final autsayderini aniqlab berishi kerak.

Ikkala jamoa ham shu kunga qadar yevrokuboklar doirasida biror marta duch kelishmagan. «Lester»ning bu kabi musobaqaga har doim ham mehmon bo‘lavermasligini hisobga olsak, bu tabiiy holat.

Chempionat Klaudio Raneri shogirdlari uchun butunlay ikkinchi darajali musobaqaga aylanib bo‘lgan. Jamoa yangi sarguzashtlarini Yevropadan izlamoqda va hozircha bu muvaffaqiyatli kechmoqda. Amaldagi Yevropa ligasi g‘olibi mag‘lub etilgan taqdirda jamoa tarixida yangi sahifa ochiladi.

Tribuna.Uz talqiniga ko‘ra imkoniyatlar: 50-50